Дырэктар Магілёўскага ГКУП цеплаэнергетыкі пра галоўныя драйверы праекта Праграмы сацыяльна-эканамічнага развіцця краіны на 2021-2025 гады

«Найважнейшая з мэт – канкурэнтаздольнасць нашай прамысловасці»

Андрэй Конеў, дырэктар Магілёўскага гарадскога камунальнага ўнітарнага прадпрыемства цеплаэнергетыкі:

– У Асноўных палажэннях праекта Праграмы сацыяльна-эканамічнага развіцця краіны падведзены вынікі працы нашай дзяржавы за апошнія гады і пастаўлены задачы на бліжэйшую пяцігодку.

Для мяне як для кіраўніка прадпрыемства найбольш важнай з дасягнутых мэт з'яўляецца канкурэнтаздольнасць беларускай прамысловасці. Гэта сведчыць пра тое, што нашу прадукцыю ведаюць і цэняць ва ўсім свеце. Як следства – з'яўляюцца новыя працоўныя месцы, расце аб'ём экспарту, Беларусь зарабляе грошы, каб забяспечыць развіццё іншых сфер, павысіць якасць жыцця людзей.

Другі істотны момант: Беларусь уступіла ў лік дзяржаў, якія выкарыстоўваюць мірны атам для выпрацоўкі цеплавой энергіі. З'явіўся дадатковы напрамак у імпартазамяшчэнні паліва, больш магчымасцей для пераабсталявання цеплакрыніц. Я больш не хвалююся, колькі нашаму прадпрыемству спатрэбіцца паліва, бо яго кошт будзе рэгулявацца ў межах рэспублікі.

Яшчэ адным сур'ёзным пунктам развіцця лічу тое, што наша краіна ўвайшла ў тройку лідараў вытворчасці калійных угнаенняў і на 100 працэнтаў забяспечвае сябе харчаваннем.

Матэрыяльна забяспечаны работнік, стабільная эканоміка краіны – значыць, больш сіл і энергіі можна выдаткоўваць на развіццё навуковых напрамкаў, рабіць крок наперад у адпаведнасці з патрабаваннямі часу.

Як абывацеля мяне вельмі парадаваў факт, што беларуская прырода таксама на годнай пазіцыі ў рэйтынгу экалагічнай эфектыўнасці. Атрымліваецца, мы вырабляем прадукт, а затым маем магчымасць адпачыць у чыстай экалогіі, падзарадзіцца і з новымі сіламі вярнуцца да працы.

Праўда, усё дасягнутае магло быць яшчэ лепшым, калі б не ўмяшалася і не прытармазіла нас пандэмія. Але, упэўнены, у гэтым годзе з нашым імкненнем і працаздольнасцю выканаем усе пастаўленыя задачы.

СБ