Дзень народнага адзінства ў Магілёве атрымаўся яшчэ і літаратурным

Калі вы думаеце, што бібліятэка – гэта сумна і кансерватыўна, значыць, вы не знаёмыя з працай калектыву Цэнтралізаванай сістэмы дзяржаўных публічных бібліятэк Магілёва.

– У нас заўсёды весела, цікава і шумна, – усміхаецца дырэктар установы культуры Вольга Волкава, прэзентуючы пляцоўку, якая стала часткай святочных мерапрыемстваў, прысвечаных Дню народнага адзінства. – Не маглі абысці бокам 140-годдзе Янкі Купалы і Якуба Коласа, таму тут вы бачыце інтэрактыўныя плакаты, прысвечаныя іх жыццю і творчасці. Чаму інтэрактыўныя? На саміх плакатах толькі дзесяць цікавых фактаў пра гэтых выдатных беларусаў, але з дапамогай гаджэтаў можна адсканаваць спецыяльныя коды і больш глыбока азнаёміцца з біяграфіяй і літаратурнай спадчынай.

Непадробную цікавасць дзяцей і дарослых выклікала падлогавая гульня «Нерэальны Магілёў», якая звязана з усімі цікавымі месцамі горада і знакавымі для яго датамі. Таксама бібліятэкары арганізавалі некалькі інтэрактыўных лакацый, дзе можна было пазнаёміцца з прадметамі побыту нашых продкаў, сплесці фенечкі ў беларускім стылі на майстар-класе або скарыстацца фотазонай з беларускім каларытам.

– Акрамя таго, да Дня народнага адзінства далучыліся ўсе бібліятэкі Магілёва і падрыхтавалі цікавыя праграмы на месцах, якія мелі шмат выстаў, гульняў, віктарын, цікавых інфармацыйных матэрыялаў, – працягвае Вольга Уладзіміраўна. – Наша літаратура, забаўляльная або пазнавальная, – гэта тое, што сапраўды аб’ядноўвае беларусаў. Многія творы любімыя з пакалення ў пакалення, гэта наш культурны код. Таксама кнігі даюць нам веды аб мінулым, прымушаюць задумвацца аб тым, хто мы, дзе і для чаго жывём. Нацыянальная самаідэнтыфікацыя.

 СБ