Дзень Незалежнасці Беларусі з’яўляецца сімвалам нацыянальнага гонару, доблесці і славы – Леанід Заяц

Дзень Незалежнасці Рэспублікі Беларусь з’яўляецца сімвалам нацыянальнага гонару, доблесці і славы. Гэта свята непарыўна звязана з адной з найважнейшых падзей айчыннай гісторыі–вызваленнем Радзімы ад нямецка-фашысцкіх захопнікаў. На гэта звярнуў увагу, выступаючы на мітынгу, прысвечаным святкаванню 3 ліпеня, старшыня Магілёўскага аблвыканкама Леанід Заяц.

«Мы памятаем, што наша незалежнасць заснавана на заслугах пакалення пераможцаў, – падкрэсліў кіраўнік рэгіёна. – Фашысцкая Германія будавала планы па знішчэнні славян, але нашы людзі не сталі на калені, бо Радзіма і свабода – святыя для нас словы».

З першых дзён вайны Беларусь стала месцам буйных бітваў, жывым шчытом на шляхуворага, адзначыў Леанід Заяц. Ні пядзі роднай зямлі не было аддадзена без бою, а на Буйніцкім полі пісаліся старонкі несмяротнага летапісу Перамогі. Гераічная абарона Дняпроўскага рубяжа шмат у чым стала прычынай зрыву гітлераўскага плана маланкавай вайны. У памяці чалавецтва навечна застанецца подзвіг тых, хто 23 дні і ночы паказваў невымерную мужнасць і стойкасць пры абароне роднай зямлі. Гэта салдаты Чырвонай Арміі, апалчэнцы і простыя жыхары Магілёва.

Вялікая Айчынная вайна і фашысцкая акупацыя прынеслі неймавернае гора і бедства. Ахвярамі фашысцкай палітыкі генацыду і выпаленай зямлі ў Беларусі стала больш за 2 млн. чалавек. Загінуў кожны трэці жыхар рэспублікі. Жорсткі вораг разбурыў сотні гарадоў і спаліў тысячы вёсак. «Мы памятаем трагедыю вёскі Боркі, дзе амаль 2 тыс. мірных жыхароў былі спаленыя жывымі толькі таму, што захопнікам хацелася стаць гаспадарамі зямлі і зламаць мужнасць непакорнага народа, – падкрэсліў Леанід Заяц. – Мы памятаем, што ў слаўным ваенным летапісе ёсць важкая доля подзвігу нашых землякоў. 114 ураджэнцаў Магілёўшчыны былі ўдастоены высокага звання Героя Савецкага Саюза, 23 сталі поўнымі кавалерамі ордэна Славы. Нашы грамадзяне абаранялі Маскву і Сталінград, білі ворага на Курскай дузе ў Балтыйскім моры, вызвалялі Еўропу і салютавалі перамозе ў Берліне».

Кіраўнік рэгіёна адзначыў, што Дзень Незалежнасці ў першую чаргу – свята ветэранаў. «У імя незалежнасці нашай Айчыны, нашай будучыні вы неслі непасільныя пакуты, праяўлялі нязломны характар, волю і адзінства. Ламаючы жорсткага ворага, неслі свабоду мірнаму народу. Вы адстаялі краіну, а затым тытанічнай цяжкасцю аднавілі яе з руін і попелу. Мы ніколі гэтага не забудзем. Мы ў вечным даўгу перад вамі», – адзначыў Леанід Заяц.

Ён звярнуў увагу, што ў імя памяці герояў Вялікай Айчыннай вайны цяперашняе пакаленне абавязана захаваць мір і незалежнасць сваёй зямлі, каб перадаць гэтую самую вялікую каштоўнасць маладым.

Мітынг, прысвечаны Дню Незалежнасці Рэспублікі Беларусь, адбыўся сёння на мемарыяльным комплексе «Буйніцкае поле». Ускласці вянкі і кветкі на святым для кожнага жыхара Прыдняпроўскага краю месцы прыйшлі кіраўнікі горада і вобласці, прадстаўнікі абласнога і гарадскога Савета дэпутатаў, сілавых структур, грамадскіх арганізацый, працоўных калектываў, ветэраны і моладзь. Памяць загінулых салдат ушанавалі хвілінай маўчання, у іх гонар прагучаў зброевы салют.