Дзіцячая паліклініка № 1 у Магілёве ўрачыста адкрыта ў новым будынку

Пасля маштабнай рэканструкцыі будынка былой Магілёўскай паліклінікі № 3 сюды пераехала дзіцячая паліклініка № 1. Гэта яшчэ адзін крок у развіцці аховы здароўя вобласці.

Урачыстае адкрыццё аб’екта адбылося сёння з удзелам старшыні Магілёўскага аблвыканкама Анатоля Ісачанкі, міністра аховы здароўя Дзмітрыя Піневіча, памочніка Прэзідэнта – інспектара па Магілёўскай вобласці Леаніда Мартынюка, намесніка старшыні аблвыканкама Валерыя Малашкі, старшыні Маггарвыканкама Уладзіміра Цумарава, начальніка галоўнага ўпраўлення па ахове здароўя аблвыканкама Аляксандра Старавойтава, кіраўнікоў, прадстаўнікоў органаў дзяржаўнага кіравання, арганізацый, а таксама медыцынскіх работнікаў і гараджан.

«Сёння для магілёўцаў адбылася важная і знакавая падзея – мы адкрылі новы будынак дзіцячай паліклінікі № 1, – адзначыў Анатоль Ісачанка, – бо самае галоўнае для нас, дарослых, гэта клопат пра дзяцей. Наш абавязак – зрабіць усё магчымае для таго, каб яны былі здаровыя і акружаны ўвагай.

Гэта выдатны будынак з сучасным абсталяваннем і ўсім неабходным для аказання першай медыцынскай дапамогі. Аб’ект важны і патрэбны для горада і яго жыхароў. Такія аб’екты накіраваны служыць на карысць дзяцей. Паліклініка функцыянальная, разлічана на 250 наведванняў у змену, абсталявана найноўшым сучасным абсталяваннем, укамплектавана медперсаналам. Створаны ўсе ўмовы для камфортнай, паспяховай працы. Гэты крок – адзін з многіх на шляху клопату пра нашых дзяцей.

Палітыка нашай дзяржавы і Прэзідэнта Беларусі, у прыватнасці, нацэлена на сацыяльную абарону насельніцтва, у тым ліку – самых маленькіх грамадзян. І сімвалічна, што мы адкрылі гэты аб’ект у Міжнародны дзень абароны дзяцей».

Падкрэсліў гэтую думку ў сваім выступленні і Дзмітрый Піневіч. Ён выказаў меркаванне, што самы вялікі капітал – гэта здароўе людзей. Як адзін з найважнейшых элементаў сацыяльна-эканамічнай палітыкі, якой прытрымліваецца дзяржава.

«У паліклініцы мы назіраем шэраг спецыялізаваных відаў медыцынскай дапамогі, якія сталі даступныя пацыентам на першасным звяне. Вялікая ўвага пытанням прафілактыкі. Усё гэта гаворыць аб велізарным пласце працы, накіраваным на тое, каб нашы дзеці менш хварэлі. Гэта вельмі важна, – падкрэсліў міністр аховы здароўя. – Калі гаварыць аб развіцці сістэмы аховы здароўя ў цэлым, то на даны момант толькі ў Магілёве будуюцца тры буйныя аб’екты, два з якіх будуць уведзены ў эксплуатацыю ўжо ў гэтым годзе, адзін – у наступным.

Вельмі важна, што мы хутка аналізуем патрэбы і неабходнасць змяненняў у сферы аховы здароўя. Важная таксама наша дзяржаўная палітыка. Усё гэта дазваляе гаварыць аб тым, што ад высноў да іх рэалізацыі праходзіць мінімальная колькасць часу.

Да рэканструкцыі тая ж Магілёўская дзіцячая паліклініка № 1 функцыянавала ў прыстасаваным памяшканні жылога дома. Цяпер жа сама атмасфера, эстэтыка працоўнага месца ў новым будынку спрыяе эфектыўнаму і камфортнаму працоўнаму працэсу».

Гаворачы аб падрыхтоўцы кадраў, Дзмітрый Піневіч адзначыў арыенцір на актуальнасць і запатрабаванасць спецыяльнасцяў: педыятры – у іх ліку. Таксама ён адзначыў, што ўзровень заработнай платы медыкаў у гэтым годзе не знізіцца, нягледзячы на сыход ад так званых «пандэмічных» даплат:

«Указ Прэзідэнта Рэспублікі Беларусь ад 16 красавіка 2020 г. № 131 «Аб матэрыяльным стымуляванні работнікаў аховы здароўя» гарантаваў сур’ёзныя надбаўкі медыкам, якія працавалі ў «чырвонай зоне». На гэты момант кіраўніком дзяржавы дадзена чарговае даручэнне. Яно ўжо прапрацавана і неўзабаве ўступіць у сілу, што дазволіць рабіць даплаты больш шырокаму колу медработнікаў. Тым самым дазволіць захаваць годны ўзровень заработнай платы. Таксама ў сферы аховы здароўя прафесійная падрыхтоўка з’яўляецца бесперапыннай – спецыяліст пастаянна абнаўляе тэарэтычныя веды, удасканальвае свае навыкі і, адпаведна, у далейшым гэта дае надбаўкі ў заработнай плаце. Акрамя таго, кардынальныя падыходы нацэлены на арэнднае жыллё. Мяркуецца, што пасля адпрацоўкі пэўнага колькасці часу нашы супрацоўнікі змогуць па рэшткавым кошце яго выкупіць. Гэта зацікаўленасць чалавека сацыяльным пакетам».

Падчас свайго выступлення міністр аховы здароўя адзначыў асаблівы ўклад Магілёўскай вобласці ў развіццё сферы аховы здароўя і выказаў словы падзякі на адрас кіраўніцтва рэгіёна і непасрэдна медыцынскіх работнікаў.

Як расказала галоўны ўрач Магілёўскай дзіцячай паліклінікі № 1 Алеся Будзькова, плошча ўстановы пасля наваселля стала большай у пяць разоў. Пасля рэканструкцыі будынак цалкам прыведзены ў адпаведнасць з санітарнымі нормамі і правіламі. Асобная ўвага нададзена безбар’ернаму асяроддзю. Тэрыторыя абслугоўвання ахоплівае цэнтр горада і прылеглыя вуліцы, мікрараёны Юбілейны, Тэхнапрыбор, 30 гадоў Перамогі і раён чыгуначнага вакзала. У штаце сёння налічваецца 210 медработнікаў, з іх 46 – урачы, 109 – сярэдні медперсанал. У структуры дзіцячай паліклінікі тры педыятрычныя аддзяленні, аддзяленні медрэабілітацыі, дзённага знаходжання, лабараторна-дыягнастычнае, стэрылізацыйнае.

«Сучаснае абсталяванне медустановы дазволіць нам забяспечыць даступнасць і якасць паслуг дзіцячаму насельніцтву, – падкрэсліла галоўны ўрач. – Да паслуг маленькіх пацыентаў, акрамя прыёму ўрача-педыятра і вузкаспецыялізаваных спецыялістаў, таксама – два ультрагукавыя апараты высокага класа, лічбавы рэнтген-апарат, сучасная клініка – дыягнастычная лабараторыя, дзве сучасныя ўстаноўкі – працоўныя месцы афтальмолага і атарыналарынголага. Шырокія магчымасці адкрывае аддзяленне медыцынскай рэабілітацыі: нізкачастотная і высокачастотная, ультравысокачастотная імпульсная тэрапія, хвалевая і механатэрапія, цеплалячэнне, лазера- і фотатэрапія.

Адной з асаблівасцяў нашага аддзялення з’яўляецца падзел патокаў дзяцей. Гэта актуальна ў дзіцячай практыцы. Такім чынам, з’яўляецца магчымасць прымаць у адным крыле пацыентаў з вострай паталогіяй, тэмпературных, а ў другім – планавых пацыентаў па пытаннях вакцынацыі, дыспансерызацыі, афармлення даведак і інш. А пры неабходнасці, як паказаў вопыт з пандэміяй COVID-19, гэта дазваляе хутка перапрафілявацца».

Агульны кошт рэканструкцыі будынка склаў каля Br6,3 млн. Абслугоўваць па плане паліклініка будзе прыкладна 12,7 тыс. дзяцей – ад нараджэння і да паўналецця.

Юлія Таранава, фота Галіны Гаўрыловіч