Дзіцячы сад на 240 месцаў з басейнам будуюць у Бабруйску

Дзіцячы сад на 240 месцаў з басейнам будуюць у Бабруйску. Пра гэта паведаміла начальнік упраўлення адукацыі Бабруйскага гарвыканкама Алена Лісіца.

Новы дзіцячы сад разлічаны на 13 груп. «Адна з іх – спецыяльная, для дзяцей з парушэннем функцый апорна-рухальнага апарата. Яшчэ адна група будзе санаторнай, для дзетак з аслабленым здароўем, – растлумачыла начальнік упраўлення па адукацыі. – Акрамя гэтага, у дашкольнай установе будзе створана безбар’ернае асяроддзе, устаноўлены ліфт. Усё гэта неабходна для палягчэння перамяшчэння дзяцей-калясачнікаў».

Медыцынскі блок у новым дзіцячым садку будзе абсталяваны дадатковымі кабінетамі фізіятэрапіі і масажу. Тут будуць працаваць музычны, спартыўны, гімнастычныя залы. Аформлены кабінеты для заняткаў па бяспецы жыццядзейнасці, педагога-псіхолага, настаўніка-дэфектолага і метадычны.

«Групы будуць аснашчаны сучасным абсталяваннем, мэбляй, мяккімі і звычайнымі цацкамі. Для навучання будуць выкарыстоўвацца тэлевізары, стацыянарныя і перасоўныя дошкі», – адзначыла Алена Лісіца.

Басейн у новым дзіцячым садзе – на адну чашу. Тут будуць вучыцца трымацца на вадзе і займацца плаваннем дзеці ва ўзросце ад 3 да 7 гадоў.

Прылеглая тэрыторыя дашкольнай установы будзе абсталявана па апошнім слове: гульнявыя пляцоўкі з навесамі, дзве фізкультурныя пляцоўкі, дарожкі для язды на веласіпедах і самакатах.

БЕЛТА