Дзяніс Дук: у Пасланні Прэзідэнт дакладна абазначыў галоўнага бенефіцыяра вайны ў Еўропе

Агучаны ўпершыню план па ўрэгуляванні расійска-ўкраінскага канфлікту практычна ў той жа дзень стаў прадметам пільнага разгляду ў адміністрацыі Прэзідэнта Расійскай Федэрацыі, што азначае яго далейшае абмеркаванне на ўзроўні кіраўнікоў дзвюх дзяржаў. У гэтым упэўнены Дзяніс Дук, рэктар Магілёўскага дзяржаўнага ўніверсітэта імя А. Куляшова:

- Прэзідэнт падкрэсліў, што народ Беларусі не зацікаўлены ў развіцці вайны і гатовы выбудоўваць дружалюбныя адносіны з усімі краінамі-суседзямі, нават з тымі, кіраўнікі якіх сёння праводзяць недружалюбную палітыку насуперак інтарэсам свайго народа, але ва ўгоду Злучаным Штатам. У сувязі з гэтым асаблівы эмацыйны водгук у Аляксандра Лукашэнкі выклікаў абсурдны з пункту гледжання палітычнай практыкі Указ Прэзідэнта Украіны на забарону любых, у тым ліку і мірных перагавораў з Расійскай Федэрацыі.

Беларускаму народу і ўсёй сусветнай грамадскасці быў прадстаўлены глыбокі аналіз сітуацыі ва Украіне ад першай асобы - непасрэднага ўдзельніка лёсавызначальных для найноўшай гісторыі Еўропы падзей, нагадаў доктар гістарычных навук:

- Пачынаючы ад «еўрамайдана» 2014 года і да сённяшняга дня былі агучаныя перадумовы і ход развіцця канфлікту на Данбасе, роля палітычных лідэраў Украіны - Пятра Парашэнкі і Уладзіміра Зяленскага ў разгортванні антаганістычнай спіралі, раскрыты многія ініцыятывы нашага Прэзідэнта і Прэзідэнта Расійскай Федэрацыі Уладзіміра Пуціна па прадухіленні расійска-ўкраінскага канфлікту. Была агучана роля шэрагу заходнееўрапейскіх палітыкаў у разгортванні спіралі эскалацыі, пры гэтым Прэзідэнт дакладна абазначыў галоўнага бенефіцыяра вайны ў Еўропе ў асобе цяперашняй адміністрацыі ЗША.

Мірныя ініцыятывы датычыліся і дзейнасці шэрагу «збеглых» беларускіх палітыкаў, якія сёння, паводле слоў Прэзідэнта ашалеўшы, заклікаюць да гарачай фазы палітычнага супрацьстаяння на нашай зямлі рукамі навучаных на Захадзе баевікоў, адзначыў Дзяніс Дук:

- На недапушчэнне гэтага сцэнарыя акрамя дзейснай сілавой абароны накіраваны і канстытуцыйныя змены, у прыватнасці, скліканне Усебеларускага народнага сходу - вышэйшага прадстаўнічага органа народаўладдзя. Прымаць лёсавызначальныя рашэнні ад імя народа будзе не самаабвешчаная купка палітыкаў у выгнанні, а найшырэйшае прадстаўніцтва беларускага грамадства, для якога галоўнымі каштоўнасцямі заўсёды будуць мір і стварэнне. А для жадаючых вярнуцца на родную зямлю створаны прававы механізм, скарыстацца якім зараз ёсць права ў кожнага.