Факультэт механізацыі сельскай гаспадаркі БДСГА адсвяткаваў 75 гадоў

Мехфак руліць

Больш за 20 тысяч выпускнікоў за 75 гадоў. Менавіта столькі прафесійных спецыялістаў падрыхтаваў факультэт механізацыі сельскай гаспадаркі Беларускай дзяржаўнай сельскагаспадарчай акадэміі. Выпускнікі мехфака ўзначальваюць міністэрствы, ведамствы, буйныя арганізацыі, сельгаспрадпрыемствы краіны. Сёння на факультэце шэсць кафедраў і больш за 1600 студэнтаў.

Старшыня Магілёўскага аблвыканкама Анатоль Ісачанка – выхадзец мехфака БДСГА. Вучобу ў ВНУ ён успамінае з цеплынёй:

– Мне вельмі прыемна выступаць са сцэны ў якасці выпускніка і віншаваць усіх з юбілеем. За гэты час факультэт механізацыі сельскай гаспадаркі скончылі 20 тысяч чалавек. У гэтым ліку і я, што вельмі ганарова. Факультэт мае багатую гісторыю, традыцыі, славіцца сяброўствам, падтрымкай. Адчуў гэта, калі быў студэнтам. Гэта самыя добрыя часы: з аднаго боку, была свабода, а з другога – кантроль. Як бы ні бавіў час, разумеў, што трэба здаць экзамены, залікі, атрымаць стыпендыю. Я ўдзячны лёсу, што скончыў менавіта гэты факультэт, менавіта БДСГА. Тут свае традыцыі, свая аўра. Калі ты акунуўся ў яе, а потым рухаешся па жыцці ў розных напрамках, пасадах, усё роўна ўспамінаеш гэта час. Тады цябе вучылі думаць, аналізаваць, прымаць рашэнні. У жыцці гэта дапамагала, дапамагае і будзе дапамагаць.

На думку рэктара БДСГА Віталя Веліканава, развіццё факультэта механізацыі не спынялася ні на хвіліну:

– Ва ўсе часы тут адбываліся навацыі, адкрываліся вельмі важныя спецыяльнасці. З гэтага года мы будзем набіраць студэнтаў на прэстыжную спецыяльнасць «Тэхнічны сэрвіс». Нядаўна адкрыты вучэбна-выставачны цэнтр абсталяваны элементамі дакладнага земляробства, функцыянуе станцыя дыягностыкі, мы падыходзім да завяршэння працы над новай станцыяй тэхнічнага абслугоўвання аўтамабіляў, якая будзе задзейнічана ў навучальным працэсе. На факультэце працуе моцная каманда, на чале якой – крэатыўны дэкан Уладзімір Гусараў. Ён не толькі выкладае, але і можа сесці за штурвал камбайна, трактара і паказаць на ўласным прыкладзе, як трэба працаваць. Уменне працаваць разам – маладога кіраўніка і выдатных навукоўцаў – дарагога варта.

Трактарны біятлон, фестываль прафесійнага майстэрства «Акадэміяпрофі», конкурс па хуткаснай зборцы рухавіка... Усе гэтыя спаборніцтвы – ідэі дэкана Уладзіміра Гусарава, якія ўдалося ўвасобіць у жыццё:

– Я ганаруся за факультэт! Да нас прыехалі нашы дарагія выпускнікі, каб павіншаваць ВНУ са святам, прыйшлі дарагія ветэраны. Яны аддалі частку свайго жыцця не толькі факультэту, але і студэнтам, уклалі ў іх фундаментальныя веды. Некаторыя выпускнікі праслаўляюць акадэмію на ўсю краіну і далёка за яе межамі. Удзячны і прафесарска-выкладчыцкаму складу, які працуе цяпер і паказвае вынік. Ганаруся кожным выпускніком, кожным выкладчыкам, кожным студэнтам. Хачу пажадаць усім мірнага неба над галавой. Наперад! Без страху і сумневу.

СБ