Фестываль «Вытокi» стартуе ў Касцюковічах

Для Касцюковічаў спартыўна-культурны фестываль «Вытокi. Крок ды Алiмпу» стане галоўнай падзеяй гэтага лета. Такой думкай з падзялілася намеснік старшыні Касцюковіцкага райвыканкама Валянціна Манушэнка.

Спартыўна-культурны фестываль «Вытокi. Крок ды Алiмпу» 18-19 жніўня прымаюць Касцюковічы. Двухдзённая праграма мерапрыемства стартуе з прэс-тура для СМІ, падчас якога журналісты пазнаёмяцца з гэтым раённым цэнтрам, яго гісторыяй, мясцовымі традыцыямі і звычаямі, перспектывамі развіцця. У праграме - экскурсія па краязнаўчым музеі, паездка на Беларускі цэментны завод і дэгустацыя страў нацыянальнай кухні.

«Прадстаўнікам СМІ мы таксама раскажам аб тым, якімі талентамі багатая касцюковіцкая зямля, бо толькі паэтаў і пісьменнікаў у нас налічваецца каля 30 чалавек, - расказала Валянціна Манушэнка. - Пазнаёмім з гісторыяй устаноўленага ў горадзе памятнага знака «Літаратурная спадчына», раскажам пра штогадовыя брэндавыя мерапрыемствы нашых аграгарадкоў - кірмаш «Ільінскі кірмаш», святы «Гусінае свята» і «Лукаў дзень», «Свята бульбы», «Яблычны Спас». Гасцей будзем частаваць духмяным хлебам, запечанай цыбуляй, бабкай з печы, яблычным пірагом, травянымі чаямі».

У першы дзень таксама адбудзецца семінар па актуальных пытаннях падрыхтоўкі спартсменаў, які арганізуюць спецыялісты Беларускага ўніверсітэта фізкультуры, Вышэйшай школы трэнераў і спартыўных арганізацый Магілёўскай вобласці. У сваю чаргу Беларуская алімпійская акадэмія правядзе семінар-практыкум для педагогаў агульнай сярэдняй і дашкольнай адукацыі. Яго ўдзельнікаў пазнаёмяць з алімпійскімі каштоўнасцямі і дасягненнямі беларускіх атлетаў за апошнія 4 гады.

Бліжэй да вечара пачнецца мастацкі інтэрактыў «Гуляйце з намі – малюйце самі». Мастакі загадзя нанеслі фарбамі на асфальт гульнявое поле, якое стане захапляльнай зонай актыўнасці для самых маленькіх гасцей свята. Вячэрнюю праграму першага дня завершыць кінапаказ пад адкрытым небам - гледачы паглядзяць спектакль тэатра-студыі кінаакцёра «Брыялін».

Самым масавым і насычаным стане другі дзень фестывалю, арганізаванага Нацыянальным алімпійскім камітэтам. Праграму мерапрыемстваў адкрые алімпійскі забег, у якім прымуць удзел больш за 500 дзяцей ва ўзросце ад 4 да 9 гадоў. Пасля ўрачыстай цырымоніі адкрыцця фестывалю ў Касцюковічах возьме старт алімпійскі квэст, у якім змогуць прыняць удзел дзеці да 14 гадоў. Жадаючыя правераць свае сілы ў розных спартыўных конкурсах, выканаўшы ўсе заданні якіх можна атрымаць каштоўны прыз. Актыўнасці пройдуць на 30 пляцоўках па такіх відах спорту, як барацьба, бокс, біятлон, веласпорт, валейбол, баскетбол, кулявая стральба, настольны тэніс, конны спорт, каратэ, тэніс, гандбол, турнір па брэйк-дансе і інш.

На «Вытоках» таксама будзе прадстаўлена новая ў гэтым сезоне пляцоўка «Гульні нашага двара», на якой можна згуляць у любімыя старэйшымі пакаленнямі бульбу, паскакаць у класікі і гумку, пастраляць з рагаткі. Акрамя гэтага, у праграме - прэзентацыя калекцый адзення беларускіх прадпрыемстваў і дызайнераў «Роднае-моднае», конкурсы песенных тэкстаў «Вершы пра галоўнае» і лепшых маладых вакалістаў. На сцэну вячэрняга гала-канцэрта выйдуць папулярныя артысты беларускай эстрады. Завершаць свята маляўнічы феерверк і дыскатэка.

«Для Касцюковічаў такое яркае і маштабнае свята вельмі важнае, - дзеліцца Валянціна Манушэнка. - Да яго правядзення наш горад змяніўся, бо як любая гаспадыня перад прыходам гасцей робіць дома генеральную ўборку, так і мы паўсюдна навялі парадак. Прыйшлося, вядома, папрацаваць, але гэта таго варта. І гэта таксама станоўчы момант. Свята «Вытокі» вельмі чакаюць нашы дзеці, бо для іх мерапрыемства стане галоўнай падзеяй гэтага лета. Касцюковічам вельмі пашанцавала, што менавіта тут ладзіцца свята. Гэтае развіццё і папулярызацыя спорту, зносіны і незабыўныя эмоцыі».

БЕЛТА