Фільм з нулявым бюджэтам, або крымінальны дэтэктыў ад тытанаў беларускага кінематографа: у Магілёве адбыўся спецпаказ фільма «Недатыкальнасць»

Спецпаказ фільма «Недатыкальнасць» і знаёмства з творчай групай стужкі прайшлі ў Магілёўскім кінатэатры «Ветразь». Мерапрыемства адбылося ў межах святкавання 95-годдзя беларускага кіно.

На сустрэчу з гледачамі розных узростаў прыехалі рэжысёр Дзмітрый Зайцаў і акцёр Аляксандр Кашпераў. Яны расказалі аб сваім жыццёвым і прафесійным шляху, сябрах, ідэі фільма і працэсе здымкі кінастужкі. Людзі, якія сабраліся ў зале, пасля прагляду працы, змаглі задаць пытанні гасцям.

Дэтэктыў «Недатыкальнасць» выйшаў у пракат у 2017 годзе і ўжо паспеў заваяваць Гран-пры 20-га Міжнароднага фестывалю дэтэктыўных фільмаў «ДетективФЕСТ», які праходзіў у Маскве ў красавіку 2018 года.

Карціна знята рэжысёрамі-пастаноўшчыкамі, аператарамі, сцэнарыстамі і прадзюсарамі Дзмітрыем Зайцавым і Юрыем Елхавым. Нагадаем асноўныя вехі майстроў. Юрый Елхаў – аператар культавых савецкіх кінаказак Леаніда Нячаева «Прыгоды Бураціна» і «Пра Чырвоную Шапачку», рэжысёр беларускага гістарычнага блокбастара «Анастасія Слуцкая». Дзмітрый Зайцаў як аператар зняў карціны «Іван Макаравіч» Ігара Дабралюбава, «Людзі на балоце»Віктара Турава, «Чорная бяроза» Ігара Чацверыкова і іншыя. Як рэжысёр – фільм «Кветкі правінцыі» паводле рамана Георгія Марчука, вострасюжэтныя карціны «Паміж жыццём і смерцю» з Яўгенам Сідзіхіным і «Зграя» з Сяргеем Гармашам.

Увогуле, абодва – людзі вопытныя і бывалыя. Але ў апошні час аказаліся не пры справах на роднай кінастудыі. Але, як гаворыцца, не май 100 рублёў, а май 100 сяброў. Яны стварылі кароткаметражку «Недатыкальнасць» з бюджэтам 0 рублёў. Інтэр’ер здымалі ў доме мастака Алега Арлова, яго ж палотны ўпрыгожылі фільм. Арлоў таксама напісаў саўндтрэк да фільма. Выдатныя беларускія акцёры Аляксандр Кашпераў і Вольга Рэптых здымаліся бясплатна, з любові да мастацтва.

Створаны фільм па матывах дэтэктыўнага апавядання амерыканскага пісьменніка Роберта Колбі «Голас уначы». Амерыканскую гісторыю адаптавалі да мінскіх дэкарацый. Здымкі і мантаж завяршылі ўсяго за два месяцы.

Дзеянне вострасюжэтнага фільма з першапачаткова непрадказальнай развязкай адбываецца ў горадзе, які вельмі нагадвае беларускую сталіцу, а ў герояў славянскія імёны і прозвішчы. Мужчына называе сябе Сяргеем, для блізкіх – Сержам. Ён, як маецца на ўвазе, надзвычай уплывовы і багаты чалавек, не абцяжараны маральнымі прынцыпамі і не сумняваецца ва ўласнай беспакаранасці, магчыма, гарантаванай дэпутацкай недатыкальнасцю, на што намякае назва фільма. Сяргей раскошна жыве ў загарадным асабняку, смакуе ў адзіноце піва і абдумвае, нібы шахматную партыю, вераломны спосаб знаёмства з прастадушнымі і даверлівымі маладымі жанчынамі, завабліваючы іх у пастку…

На працягу года стужку будуць дэманстраваць у кінатэатрах Магілёва і вобласці.