Форум сельскай моладзі пройдзе 26-27 лістапада ў Кіраўскім і Бабруйскім раёнах

Форум сельскай моладзі «Сяло - тэрыторыя развіцця» пройдзе 26-27 лістапада ў Кіраўскім і Бабруйскім раёнах Магілёўскай вобласці, паведаміла сакратар Цэнтральнага камітэта БРСМ Вераніка Гудкова.

Форум аб'яднае каля 100 маладых работнікаў аграпрамысловага комплексу і сацыяльнай сферы вёскі. Адкрыццё адбудзецца 26 лістапада ва ўстанове культуры «Жыліцкі гістарычны комплекс-музей».

«Важны складнік адкрыцця - цырымонія ўзнагароджання пераможцаў рэспубліканскага конкурсу БРСМ «Моладзь - за ўраджай». Узнагарода ў намінацыі «Маладзёжны экіпаж камбайнераў, які дасягнуў найбольшага намалоту» чакае трактарыста-машыніста УП «Барысаўскі камбінат хлебапрадуктаў» ААТ «Мінскаблхлебапрадукт» Уладзіміра Голуба і ў намінацыі «Малады вадзіцель, які перавёз найвышэйшую колькасць зернебабовых культур», - кіроўцы ААТ «Кухчыцы» Андрэя Аляксейчыка», - распавяла Вераніка Гудкова.

Паводле яе слоў, праграма форуму нацэлена на дэманстрацыю лепшага вопыту па стварэнню ўмоў для пражывання і працы моладзі ў вёсцы, падтрымку ініцыятыў сельскай моладзі, абмен сучаснымі практыкамі, якія садзейнічаюць фарміраванню кадравага рэзерву для галіны сельскай гаспадаркі і замацаванню моладзі на прадпрыемствах аграпрамысловага комплексу.

На палях форуму будзе арганізавана работа тэматычных секцый як на сельгаспрадпрыемствах, так і на аб'ектах сацыяльнай сферы. «Акрамя таго, удзельнікі павінны прыняць удзел у музычнай віктарыне «Моладзь наперад!». Адбудзецца і традыцыйная «Народная зарадка», - адзначыла сакратар ЦК БРСМ. - Важнай часткай праграмы стане наведванне мемарыяльнага комплексу «Ахвярам фашызму». Удзельнікі аддадуць даніну памяці ахвярам самай страшнай катастрофы XX стагоддзя і ўскладуць кветкавыя кампазіцыі».

Немалаважны складальнік форуму - культурна-дасугавая праграма. Маладыя людзі пабываюць на экскурсіі ў Бабруйскай крэпасці, наведаюць музей пад адкрытым небам «Сінагога», ускладуць кветкі да брацкай магілы воінаў Чырвонай арміі і магілы ўнучкі А.С.Пушкіна.

Па выніках форуму будзе прынята рэзалюцыя.

Галоўнай мэтай рэспубліканскага форуму сельскай моладзі «Сяло - тэрыторыя развіцця», арганізатарамі якога выступаюць Беларускі рэспубліканскі саюз моладзі сумесна з Магілёўскім абласным выканаўчым камітэтам пры падтрымцы Міністэрства адукацыі і Міністэрства сельскай гаспадаркі і харчавання, з'яўляецца стварэнне ўмоў для павышэння сацыяльнай і эканамічнай актыўнасці сельскай моладзі.

БЕЛТА