Фотавыстава аўтарскіх навагодніх паштовак пройдзе ў Магілёве

Фотавыстава аўтарскіх навагодніх паштовак упершыню пройдзе ў Магілёве, расказала арганізатар праекта вядомы магілёўскі фотажурналіст Ірына Савосіна.

Выстава будзе працаваць з 29 лістапада ў Магілёўскім музеі этнаграфіі. «Віншавальная паштоўка ад фатографа, альбо PF, узяла назву ад першых літар французскага словазлучэння «Pour Feliciter», што ў перакладзе азначае «каб павіншаваць», – адзначыла Ірына Савосіна. – Такі творчы фармат – з’ява ўнікальная, ён стаў папулярным сярод прафесійных фатографаў у сярэдзіне 80-х гадоў мінулага стагоддзя. Такія паштоўкі заўсёды рабіліся ўручную і ў адзінкавых экзэмплярах, таму і сталі аб’ектамі калекцыянавання. Яны былі не толькі своеасаблівай творчай справаздачай фатографа за пэўны перыяд, але і аўтарскім падарункам калегам да Новага года».

На выставе ў Магілёве можна будзе ўбачыць амаль 240 работ – вынік творчасці 60 фотамастакоў з 10 краін свету. Характэрна, што гэтыя паштоўкі ствараліся ў розныя гады – з сярэдзіны 1980-х і да 2019-га. Нягледзячы на тое, што выстава прымеркавана да зімовых святаў, сюжэты ў PF не абавязкова звязаныя з Новым годам: на паштоўках можна ўбачыць зусім розныя стылі – аж да фатаграфіі ню.

«Як правіла, у Магілёве выставы PF праводзіліся толькі ў фотаклубах і былі ў якасці падвядзення вынікаў конкурсаў сярод прафесійных фатографаў, – патлумачыла Ірына Савосіна. – Праект такога маштабу для шырокага кола грамадскасці арганізаваны ўпершыню. Менавіта таму мы ўключылі ў спіс выставачных работ як вядомых у савецкі час аўтараў, так і маладых фатографаў. Гэта дасць магчымасць наведвальнікам экспазіцыі не толькі атрымаць эстэтычнае задавальненне, але і пазнаёміцца з гісторыяй фотамастацтва».

Многія PF-паштоўкі ўзятыя з прыватных калекцый. На выставе можна ўбачыць работы вядомага мэтра і аднаго са стваральнікаў магілёўскай школы мастацкай фатаграфіі Зіновія Шэгельмана, ганаровага члена Нацыянальнага саюза фотамастакоў Украіны і найстарэйшага адэскага фатографа Вадзіма Шулекі, легендарнага латвійскага фатографа і кавалера ордэна Трох зорак, найвышэйшай дзяржаўнай узнагароды Латвіі, Яніса Глейздса, а таксама многіх іншых таленавітых людзей.

БЕЛТА