Галоўны прыз рэспубліканскага конкурсу «Песні Перамогі» сярод вакалістаў ва ўзросце 60+ з'ехаў у Магілёў

У Мінску прайшоў фінал рэспубліканскага вакальнага конкурсу сярод ветэранаў «Песні Перамогі». Творчае спаборніцтва праводзіцца раз на два гады і збірае сотні ўдзельнікаў з усёй краіны. Арганізатары — Федэрацыя прафсаюзаў Беларусі сумесна з Палацам культуры ветэранаў.

«Песні Перамогі» — гэта перш за ўсё магчымасць творчага развіцця былых работнікаў прадпрыемстваў і актыўных прадстаўнікоў працоўных калектываў. Дарэчы, заявак на сёлетні конкурс паступіла каля 180 — гэта індывідуальныя выканаўцы ад 60 гадоў.

Фіналісты выканалі два разнажанравыя творы, адзін з якіх быў на ваенную тэматыку. Журы ацаніла ўзровень выканальніцкага майстэрства і артыстычнасць, дзе галоўны крытэрый - наколькі канкурсант пражываў той матэрыял, які ён выконваў.

Па выніках дыплом першай ступені — у Ганны Блізняковай з Магілёва, другое месца падзялілі Віктар Лапін са Жлобіна і Анатоль Пятраеў з Магілёўскай вобласці, дыпломамі трэцяй ступені ўзнагароджаны Марыя Жыценёва з Брэста і Юрый Пазняк з Гомеля. Спецыяльны прыз ад ФПБ аказаўся ў руках Сулім Акцябрыны з Мінска.

— Гэты год праходзіць пад знакавай датай — 80-годдзя Вялікай Перамогі. Наша задача — засцерагаць, захоўваць памяць аб тым вялікім подзвігу нашых людзей. Конкурс - гэта яшчэ адна магчымасць і моладзі, і больш даросламу пакаленню нагадаць аб падзеях тых гадоў, - адзначыла намеснік старшыні Федэрацыі прафсаюзаў Таццяна Філімонава. — Мы разумеем, што ў гады Вялікай Айчыннай вайны ў прамым сэнсе песня дапамагала перамагаць. І сёння, ужо ў мірны час, калі сутыкаешся з любымі перашкодамі, жыццёвымі складанасцямі, песня па-ранейшаму дапамагае з усім спраўляцца.

Паводле слоў намесніка старшыні, адна з задач прафсаюзаў — гэта ўсебаковая падтрымка людзей, якія пайшлі на заслужаны адпачынак. Абсалютная большасць калектыўных дагавораў змяшчаюць палажэнні па аказанні падтрымкі ветэранам вайны і працы.

— Гэта матэрыяльныя выплаты да прафесійных і іншых свят, дапамога ў аздараўленні і лячэнні, дастаўцы паліва, добраўпарадкаванні прысядзібных участкаў, падарункі да юбілеяў і многае іншае, — пералічыла Таццяна Філімонава. - Акрамя таго, былыя работнікі арганізацый ва ўсіх рэгіёнах актыўна ўдзельнічаюць у грамадскім жыцці сваіх працоўных калектываў, з'яўляюцца ганаровымі гасцямі на ўрачыстых мерапрыемствах, прымаюць удзел у сустрэчах з маладымі работнікамі, перадаюць ім свой вопыт і веды.

СБ