Гліняныя свістулькі Магілёўскага Падняпроўя ўключаны ў Дзяржаўны спіс гісторыка-культурных каштоўнасцей

Крычаўскі край здаўна славіўся ганчарамі і керамістамі, і вось ужо больш за 30 гадоў займаецца тут папулярызацыяй народнай фальклорнай культуры народны майстар Вячаслаў Якавенка. Гліняных чалавечкаў, качачак, мядзведзікаў, кацянят лепіць і яго жонка Любоў Яшчанка. Як гавораць умельцы, на кірмашах асаблівым попытам карыстаюцца іх незвычайныя звяркі - коні-качкі.

Падняпроўская цацка-свістулька - не проста выраб з гліны. Каб яна загучала, трэба прыкласці нямала намаганняў. А яшчэ людзі вераць: керамічныя свістулькі - выдатны абярэг, яны абараняюць ад жыццёвых нягод, прыцягваюць поспех, дапамагаюць захаваць гармонію.

Але галоўнай задачай тых, хто шмат гадоў таму пачаў працаваць з глінай, было адрадзіць і захаваць старажытны промысел.

- Вячаслаў Мікалаевіч папулярызуе ўсе формы і вобразы гліняных народных цацак-свістулек, праводзіць майстар-класы, прэзентацыі, семінары, чытае лекцыі. Ён – кіраўнік студыі дэкаратыўна-прыкладной творчасці «Свістулька», кіраўнік народнай студыі дэкаратыўна-прыкладнога мастацтва «Добрасць» Крычаўскага раённага цэнтра культуры, а таксама аб'яднанні па інтарэсах «Гліняная цацка» Крычаўскага раённага цэнтра дадатковай адукацыі для дзяцей і моладзі «Крэчут», - падкрэслілі ў Магілёўскім абласным метадычным цэнтры народнай творчасці і культурна-асветніцкай працы. – А ў Магілёве традыцыю лепкі гліняных цацак адраджае яго жонка – Любоў Міхайлаўна кіруе аб'яднаннем па інтарэсах «Чароўная гліна» пры СШ N44. У Крычаве ўжо шмат гадоў з іх падачы праходзіць міжрэгіянальны фестываль народнай творчасці «Крычаўскі канёк», які стаў брэндам раёна. А носьбіты традыцый папулярызуюць Падняпроўскую гліняную цацку на фестывалях, конкурсах, выставах, форумах, праводзяць майстар-класы як у Беларусі, так і ў Расіі. Гэтай зімой пастановай Міністэрства культуры РБ элементу «Традыцыйныя вобразы і тэхналогія вырабу гліняных народных цацак-свістулек Магілёўскага Падняпроўя» прысвоены статус гісторыка-культурнай каштоўнасці.

СБ