Гурт «Аўра» рыхтуе канцэрт для свята «Купалле» ў Александрыі

Лаўрэаты прэміі «За духоўнае адраджэнне» Яўген Алейнік і Юлія Быкава рыхтуюць канцэрт для свята «Купалле» ў Александрыі, на якім прагучаць песні з альбома «Куточак Беларусі» ў выкананні зорак беларускай эстрады. Пра гэта распавёў лідар гурта «Аўра», прадзюсер, кампазітар Яўген Алейнік.

«Я рады, што нам даверылі правядзенне вялікага канцэрта. Усе нашы 27 песень з альбома «Куточак Беларусі» суцэльныя, і праграма, якую мы прадставім, будзе годнай. Пакуль яна носіць рабочую назву «Зроблена ў Беларусі». Мы хочам зрабіць такое шоу, якое б здзівіла і захапіла нашых гледачоў-беларусаў і гасцей нашай краіны», – сказаў Яўген Алейнік.

Ён адзначыў, што сусветныя зоркі, якія выступаюць на вялікіх пляцоўках Беларусі, заўсёды спяваюць ужывую. «Таму і мы хочам зрабіць праграму, выкананую жыўцом. Для гэтага задзейнічаем 30-40 музыкаў, якія будуць акампанаваць усім артыстам. Дарэчы, у нашым шоу возьмуць удзел Анатоль Ярмоленка, Іна Афанасьева, Аляксандр Саладуха, Вікторыя Алешка, гурт «Дразды», Іскуі Абалян, маладыя артысты. Мы пастараемся зрабіць канцэрт суцэльным, вельмі дынамічным і душэўным», – падкрэсліў кампазітар.

Паводле яго слоў, рэжысёр-пастаноўшчык праекта – Агата Мацко, харэограф – Вольга Шамрова, дызайнер сцэны – Юрый Барысевіч, дызайн кантэнту стварае Дзмітрый Сімага. «Будзе працаваць вялікая каманда, якая прыкладзе максімум намаганняў для таго, каб людзі паверылі ў беларускую эстраду. Для ўсіх нас гэта экзамен, які мы спадзяёмся вытрымаць на выдатна», – сказаў ён.

Свята «Купалле» («Александрыя збірае сяброў») плануецца правесці 6-7 ліпеня. Яго галоўная тэма – трохгоддзе малой радзімы і II Еўрапейскія гульні. Традыцыйна асноўнымі мерапрыемствамі свята стануць цырымонія адкрыцця, канцэрты на малой і галоўнай сцэнах, гандаль на імправізаваных кірмашовых вуліцах, начная дыскатэка, ушанаванне перадавікоў аграпрамысловага комплексу.

БЕЛТА