Рус Бел Eng 中文

Хедлайнерам «Вялікай бард-рыбалкі» стане папулярны расійскі бард і сатырык Цімур Шааў

Больш за 70 аўтараў выканаўцаў, артыстаў і музыкантаў з васьмі краін будзе задзейнічана ў канцэртнай праграме Х Міжнароднага музычнага фестывалю «Вялікая бард-рыбалка», які пройдзе 26-28 ліпеня ў пасёлку Грудзічына Быхаўскага раёна на беразе Чыгірынскага вадасховішча. Пра гэта паведамілі ў аргкамітэце.

У ліку хедлайнераў папулярны расійскі бард і сатырык, паэт і музыкант Цімур Шааў. Ён ужо даўно не быў у Беларусі з канцэртамі, таму прыезд для многіх аматараў гэтага аўтара, якога яшчэ называюць спеваком Жванецкім, будзе сапраўдным падарункам. Паводле слоў самога барда, ён бачыць тое, што і мы ўсе, але ён гэта яшчэ і апісвае заўсёды ярка, выразна, з гумарам. «Я перасмешнік, а мае песенькі – паўпародыі. Мне гэта ў кайф, стараюся ўсё рабіць лёгка, не затлумляючыся», – гаворыць Цімур Шааў. І ён цалкам шчыра лічыць, што шчаслівы, бо займаецца тым, што падабаецца яму самому і запатрабавана іншымі.

Яшчэ адным хедлайнерам музычнага свята стане расійскі музыкант, паэт, аўтар-выканаўца, мастак, а таксама лідар і аўтар песень гурта «Башакоў Бэнд» Міхаіл Башакоў. Ён паспрабаваў і, зразумела, дасягнуў поспеху ў мностве разнастайных прафесій: ад грузчыка да кінааператара. Ад кінааператарскага мінулага Міхаіла засталося некалькі кароткаметражных фільмаў, кліп «Духаў» на песню «Інтэлігент», сцэнарый да кліпа Паўла Кашына «Сланечнік», сцэнарый і раскадроўкі да ўласнага кліпа «Гульня», знятага Барысам Дзедзеневым у 1997 годзе. Вялікі рэзананс зрабіў на дэбютным альбоме групы «Канец фільма» сумесны хіт Башакова і лідара гэтага ансамбля Яўгена Фяклістава «Эліс» на музыку Smokie, выкананы імі дуэтам.

«Палітра юбілейнага форума вельмі яркая, насычаная і разнапланавая, – адзначыла арт-дырэктар праекта, вядомая беларуская паэтка і аўтарка-выканаўца Вольга Залеская. – На канцэртных пляцоўках будзе гучаць як аўтарская песня, так і шансон, фальк-рок, гарадскі раманс і джаз. У міратворчым праекце «Суседзі» будуць удзельнічаць госці і музыканты з васьмі краін, у іх ліку і ўпершыню на бард-рыбалцы выступіць іспанская выканаўца рускіх песень і гарадскога раманса Марычэль Родэс. А ў новым фестывальным праекце «Адэскі дворык» будзе шмат гумарных песень, анекдотаў, прыколаў, таксама прадставяць традыцыйную Адэскую кухню. Дарэчы, яго хедлайнерамі стануць папулярны тэлевядучы і знаўца Барыс Бурда і аўтар музыкі, выдатны выканаўца Марат Фахртдзінаў».

Мерапрыемства стартавала ў 2010 годзе і стала візітоўкай музычна-фестывальнага жыцця Магілёўскай вобласці. За 9 гадоў форум наведала больш за 15 тыс. гледачоў, музыкантаў і артыстаў з 14 краін: Беларусі, Расіі, Украіны, Малдовы, Польшчы, Славакіі, Германіі, Чэхіі, Ізраіля, ЗША, Літвы, Латвіі, Італіі, Балгарыі. Сярод знакамітых гасцей – Таццяна і Сяргей Нікіціны, Аляксандр Дольскі, Юлій Кім, Аляксей Івашчанка, Юрый Рашанцаў.

Арганізатарамі фестывалю выступаюць Магілёўскі аблвыканкам, Быхаўскі райвыканкам, Грамадскі савет па развіцці аграэкатурызму ў Магілёўскай вобласці і творчае аб’яднанне «Сваё асяроддзе» (Мінск).

Генеральны партнёр праекта – ААТ «Магатэкс», афіцыйны партнёр – булачна-кандытарская кампанія «Дамачай», інфармацыйныя партнёры – БЕЛТА, СБ «Беларусь сёння», Альфа Радыё, тэлеканал СТВ і тэлерадыёкампанія «Магілёў».

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая