Хуткасць абслугоўвання, камфорт пацыентаў. Аўтабаза аховы здароўя аптымізавана ў Магілёве

Гарадская аўтабаза ўстаноў аховы здароўя аптымізавана ў Магілёве. Аб гэтым журналістам расказаў начальнік галоўнага ўпраўлення па ахове здароўя аблвыканкама Аляксандр Старавойтаў.

«Раней у склад магілёўскага аўтапрадпрыемства ўваходзілі чатыры разрозненыя базы, якія размяшчаліся на тэрыторыі абласной бальніцы і супрацьсухотнага дыспансера, а таксама на вуліцах Якубоўскага і Карла Маркса, - растлумачыў Аляксандр Старавойтаў. - Іх утрыманне абыходзілася даражэй, таму што гэта мела на ўвазе асобны персанал для кожнага аб'екта. У выніку прынята рашэнне размясціць аўтамабілі на двух пляцоўках - у тубдыспансеры і па вул.Якубоўскага, дзе для гэтага трэба было стварыць належныя ўмовы».

Гаражы адрамантаваны ў адпаведнасці з сучаснымі патрабаваннямі: ёсць стаянка на 40 аўтамабіляў, камп'ютэрызаваная дыспетчарская, рамонтная зона, аўтамыйка, з набыццём якой дапамог галіновы прафсаюз. Створаны ўсе неабходныя тэхнічныя магчымасці і добрыя ўмовы для працы аддзела эксплуатацыі хуткай медыцынскай дапамогі. У гаражы цёпла і светла. Прадугледжана ўстройства для выдалення выхлапных газаў ад тэхнікі пры правядзенні рамонтных работ. Ёсць асобныя памяшканні для захоўвання шын, запчастак і іншых матэрыялаў.

Паводле слоў Аляксандра Старавойтава, сёння аўтабаза абслугоўвае практычна ўсіх жыхароў Магілёва і Магілёўскага раёна, а гэта больш за 400 тыс. чалавек. Аўтамабільны парк рэгіёну складае больш за 450 аўтамабіляў: машыны хуткай медыцынскай дапамогі, меддапамогі і іншы транспарт, які забяспечвае бесперабойную работу ўсёй інфраструктуры сістэмы аховы здароўя і неабходны для паўнацэннага абслугоўвання людзей.

Для якаснага аказання медыцынскай дапамогі аўтамабілі павінны выходзіць на лінію толькі ў спраўным стане з гарантыяй бесперабойнай працы. Эксплуатаваць машыны старэйшыя за сем гадоў небяспечна, таму ідзе пастаяннае абнаўленне машыннага парку. Толькі летась аўтапрадпрыемства атрымала 30 новых аўтамабіляў, і сёлета - ужо сем. Да канца года плануецца набыць 13 адзінак хуткай дапамогі па лініі рэспубліканскага бюджэту.

Вадзіцель Аляксандр Драмкоў як ніхто іншы ведае, што своечасовае аказанне дапамогі залежыць не толькі ад медыкаў, але таксама ад вадзіцеляў і спецыялістаў па рамонце тэхнікі. Мужчына атрымаў правы ў далёкім 1976 годзе, закрыў усе катэгорыі. Дарогу любіць і паважае, сядзеў за рулём розных машын, у тым ліку і грузавых. Памятае нават легендарны савецкі цягач «Калхіда». «Шэсць гадоў адпрацаваў на хуткай медыцынскай дапамозе, ужо сем гадоў, як перасеў на машыну меддапамогі, - адзначае ён. - Праца кіроўцы няпростая, бываюць усякія сітуацыі на дарозе. На хуткай дапамозе прыходзілася браць за дзень і да 10 выклікаў, а тут графік нармаваны - з 8.00 да 17.00. За восем гадзін магу накруціць 60 км, а магу і ўсе 160. Камфортныя ўмовы толькі дапамагаюць: калі новая машына, навокал чыста і акуратна, то і на працу ісці прыемна. Працуй, добрасумленна выконвай свае абавязкі - і ўсё будзе добра».

БЕЛТА