Ігар Марзалюк: беларусаў не трэба вучыць талерантнасці і дэмакратыі

Беларусаў не трэба вучыць талерантнасці і дэмакратыі. Пра гэта ля пасольства ЗША ў Мінску заявіў старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк.

4 ліпеня каля амерыканскага пасольства ў Мінску каля 150 неабыякавых беларусаў выказалі незадаволенасць амерыканскім віншаваннем з Днём Незалежнасці Беларусі.

«Хачу, каб прысутныя тут разумелі, хто вучыць нас дэмакратыі. Гэта людзі, якія адпраўлялі адно аднаму калядныя паштоўкі з павешанымі чарнаскурымі. Толькі ў 2008 годзе Сенат ЗША папрасіў прабачэння за ўсіх тых людзей, якія былі павешаны расістамі. Але ніхто не папрасіў прабачэння за генацыд карэннага насельніцтва Амерыкі. Ніхто не папрасіў прабачэння за бамбардзіроўкі Хірасімы і Нагасакі», – сказаў Ігар Марзалюк.

На яго думку, беларусаў не трэба вучыць ні талерантнасці, ні дэмакратыі. «У Беларусі мірна ўжываюцца праваслаўныя і каталікі, побач стаяць сінагогі і мячэці. Ніхто нікога не прыгнятае. Але самае агіднае – тое, што нас віншуюць з Днём Незалежнасці плакатам з калабарацыянісцкім сцягам», – упэўнены Ігар Марзалюк.

Ён падкрэсліў, што суверэнным з'яўляецца той народ, які сам вырашае свой лёс. «Такі народ сам вырашае, як жыць, з кім сябраваць і якім курсам ісці. Беларусь была, ёсць і будзе свабоднай і незалежнай дзякуючы 3 ліпеня 1944 года», – сказаў на заканчэнне Ігар Марзалюк.

БЕЛТА