Ігар Марзалюк: праект Канстытуцыі з’яўляецца не догмай, а кіраўніцтвам да дзеяння

Праект Канстытуцыі з’яўляецца не догмай, а кіраўніцтвам да дзеяння, заявіў старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк.

«Па-першае, я як член Канстытуцыйнай камісіі задаволены тым варыянтам, які ёсць. Па-другое, любы незаангажаваны з боку чалавек убачыць, што гэты Канстытуцыйны праект адлюстроўвае павевы часу, – сказаў Ігар Марзалюк. – Той факт, што праект Канстытуцыі апублікаваны на дзвюх мовах – рускай і беларускай – гэта паслядоўны прынцып двухмоўя, які адлюстраваны і ў цяперашняй Канстытуцыі, і ў рэальнай моўнай практыцы. І самы важны, фундаментальны момант цяперашняга праекта Канстытуцыі паказвае, што ў нас з вамі могуць быць розныя пункты гледжання на розныя праблемы, але калі мы працуем у адным прававым полі, калі Беларусь – гэта тая дзяржава, дзеля якой мы жывём, то гэта Канстытуцыя дае магчымасць ствараць любыя палітычныя праекты, любыя палітычныя партыі, рэалізоўваць сябе ў гэтай прасторы, не парушаючы фундаментальных каштоўнасцей: права на жыццё і самарэалізацыю чалавека».

Парламентарый падкрэсліў: праект Канстытуцыі з’яўляецца не догмай, а кіраўніцтвам да дзеяння. «Калі ў нас ёсць нейкія фундаментальныя супярэчнасці, то іх можна абмеркаваць на дыялогавых пляцоўках. А з улікам таго, што НЦЗПІ акумулюе ўсе прапановы (пазітыўныя і негатыўныя), потым усе гэтыя рэчы мы яшчэ можам у аператыўным парадку дапрацаваць. Таму кожны можа рэалізаваць сябе ва ўсенародным галасаванні», – дадаў ён.

БЕЛТА