Ігар Сергяенка аб задачах упраўленцаў: улада павінна сумленна і шчыра вырашаць пытанні людзей

Улада павінна сумленна і шчыра вырашаць пытанні людзей, бо яна служыць народу і працуе для яго. Аб гэтым заявіў кіраўнік Адміністрацыі Прэзідэнта Ігар Сергяенка ў час выязнога семінара-практыкума для старшынь раённых і гарадскіх выканаўчых камітэтаў Магілёўскай вобласці.

Паводле слоў Ігара Сергяенкі, у пачатку года перад упраўленцамі традыцыйна ставяцца задачы з улікам патрабаванняў кіраўніка дзяржавы, даецца ацэнка сацыяльна-эканамічнаму развіццю за мінулы перыяд. У працэсе нарады даводзіцца інфармацыя аб тых навацыях у заканадаўстве, якія старшыні гарадскіх і раённых выканаўчых камітэтаў павінны выкарыстоўваць у сваёй рабоце. Акрамя таго, выстаўляюцца патрабаванні па падборы кадраў і фарміраванні рэзерву на пасады, уключаныя ў рэестр кіраўніка дзяржавы і абласныя рэестры; закранаюцца пытанні інфармацыйнай і ідэалагічнай работы ў калектывах, развіцця сацыяльнай сферы. Гэта значыць, ахопліваюцца ўсе напрамкі развіцця рэгіёнаў, якія прысутнічаюць у іх рабоце на месцах.

«У раёнах - сіла дзяржавы, таму важна праводзіць такія мерапрыемствы, - падкрэсліў Ігар Сергяенка. - Сёння адбыўся жывы абмен думкамі, у тым ліку і па іншых пытаннях. Гэта таксама добрая магчымасць непасрэдна самім кіраўнікам пагутарыць паміж сабой, абмяняцца вопытам, узяць на ўзбраенне лепшыя прыклады. Гучала і крытыка, бо сёння кадрам выстаўляюцца высокія патрабаванні, з іх вялікае запатрабаванне за сваю работу, якую ацэньваюць і людзі. У тым ліку важна, як вядзецца работа са зваротамі грамадзян, якія іх цікавяць пытанні. Улада павінна сумленна і шчыра вырашаць іх праблемы, знаходзіць для гэтага варыянты, бо менавіта ўлада служыць народу і працуе для яго».

Тэма тыднёвага семінара – «Эфектыўнасць сістэмы дзяржаўнага кіравання ў сучасных умовах і роля кіраўнікоў мясцовых выканаўчых і распарадчых органаў у яе павышэнні». Мерапрыемства праходзіць на базе спартыўна-аздараўленчага цэнтра «Рудзея» Магілёўскага вучылішча алімпійскага рэзерву Чавускага раёна. Спектр пытанняў разнастайны - ад змяненняў у заканадаўчай базе і сацыяльна-эканамічнага развіцця да пытанняў жыллёва-камунальнай гаспадаркі. У якасці спікераў выступаюць спецыялісты абласнога выканаўчага камітэта, вучоныя Нацыянальнай акадэміі навук, выкладчыкі Беларускай дзяржаўнай сельскагаспадарчай акадэміі. Сярод запрошаных гасцей таксама старшыня Савета Рэспублікі Наталля Качанава, старшыня Цэнтральнай выбарчай камісіі Ігар Карпенка. Перад удзельнікамі семінара выступілі выдатныя грамадскія дзеячы, сярод якіх кіраўнік праўлення РДГА «Веды» Вадзім Гігін.

«Нам таксама расказваюць асноўныя навацыі заканадаўства, якія адбыліся ў 2023 годзе, - адзначыла старшыня Бялыніцкага райвыканкама Вольга Прыстромская. - Каб прымаць правільныя кіраўніцкія рашэнні і актыўна працаваць па ўсіх напрамках, нам неабходна быць у курсе ўсіх новаўвядзенняў і змяненняў заканадаўства. Праграма вельмі насычаная, мы займаемся цэлы дзень. Такія мерапрыемствы сапраўды неабходна праводзіць, яны паказваюць сваю практычную карысць у рабоце і асабліва важныя для кіраўнікоў».

На думку старшыні Бабруйскага гарвыканкама Ігара Кісяля, на семінары можна атрымаць не толькі тэарэтычныя веды, але і практычныя навыкі. «Старшыні гарадскіх і раённых выканаўчых камітэтаў у асноўным з'яўляюцца практыкамі, таму нам вельмі важна атрымаць растлумачэнні некаторых момантаў, якія пастаянна ўзнікаюць у нашай рабоце. Мы можам іх абмеркаваць з калегамі, падыскутаваць на розныя тэмы. Гэта дае нам больш вопыту і ведаў, якія будуць даведзены на месцах і выкарыстоўвацца ў штодзённым жыцці. Важна разумець напрамак, у якім усім нам неабходна рухацца ў кожнай са сфер - культуры, адукацыі, эканоміцы, будаўніцтве. Менавіта для гэтага і праводзіцца такая вучоба», - сказаў ён.

БЕЛТА