Іна Жаўнова: «Выбар будучай прафесіі вызначыла для сябе загадзя»

Малады спецыяліст Іна Жаўнова працуе майстрам на лесасеках у лесапункце Быхаўскага лясгаса. Дзяўчына, хоць і выбрала зусім не жаночую прафесію, якая ўключае ў сябе вялікае поле дзейнасці, пачынаючы з кантролю працы аператараў лесанарыхтоўчай тэхнікі «Харвестэраў» і «Фарвардэраў» да адгрузкі спажыўцу нарыхтаванай драўніны, паспяхова спраўляецца са сваімі службовымі абавязкамі.

Дзяцінства і юнацтва Іны Жаўновай прайшлі ў аграгарадку Пачопы Краснапольскага раёна. Пасля заканчэння школы яна паступіла ў Беларускі дзяржаўны тэхналагічны ўніверсітэт, асвоіўшы там спецыяльнасць «лесаінжынерная справа». Падчас вучобы праходзіла практыку ў Краснапольскім і Чэрыкаўскім лясгасах. Успамінае, што яшчэ школьніцай разам з бацькамі і малодшай сястрой часта бывала ў лесе, з захапленнем назіраючы, якая ўсё ж маляўнічая і непаўторная па прыгажосці навакольная прырода. Таму выбар будучай прафесіі вызначыла для сябе загадзя. Да таго ж, імкненне дачкі падтрымаў бацька, які па сённяшні дзень працуе аператарам «Харвестэраў» у Краснапольскім лясгасе.

Іне на сваім першым працоўным месцы прыйшлося як маладому спецыялісту адразу ж уваходзіць у курс справы. Вядома, калі ўзнікае неабходнасць, калезе ахвотна дапамагаюць вопытныя майстры, сам начальнік лесапункта Аляксандр Дубінскі. Калектыў тут невялікі, але дружны, работнікі знаходзяць агульную мову адзін з адным даволі лёгка.

Іна Жаўнова расказала, што пры размеркаванні выпускнікоў ВНУ яна папрасіла камісію накіраваць яе працаваць менавіта ў Быхаўскі лясгас. Справа ў тым, што яна яшчэ студэнткай пачала сустракацца з хлопцам з нашага горада, які вучыўся разам з ёй ва ўніверсітэце. Светлае пачуццё аказалася ўзаемным і моцным. Яе малады чалавек таксама з’яўляецца работнікам лясгаса. Праўда, цяпер ён праходзіць тэрміновую вайсковую службу ў войску, але неўзабаве ўжо павінен звольніцца ў запас, а значыць, можа нарадзіцца яшчэ адна ячэйка грамадства – новая маладая сям’я, а ў будучым, магчыма, складзецца чарговая працоўная дынастыя.

Намеснік кіраўніка арганізацыі па ідэалагічнай рабоце лясгаса Алег Дамброўскі лічыць, што адной з галоўных задач для лесагаспадарчай установы з’яўляецца замацаванне маладых кадраў. Шлюбныя саюзы гэтаму толькі спрыяюць.

Традыцыйна за кожным маладым спецыялістам замацаваны вопытны настаўнік, які дапамагае ўнікаць у тонкасці прафесіі. А каб моладзь адчувала сябе неад’емнай часткай калектыву, яе прывабліваюць таксама да грамадскага і спартыўнага жыцця лясгаса.

Тым маладым людзям, якія маюць сярэднюю спецыяльную адукацыю, даецца магчымасць завочна навучацца ў спецыялізаванай профільнай ВНУ без адрыву ад вытворчасці, што ў перспектыве пасадзейнічае руху па службовай лесвіцы.

bykhov.by