Інфармацыйна-адукацыйная акцыя «#ЗДАРОЎЕ Ў СЯЛО» пройдзе 1 лістапада на базе ЗАТ «Агракамбінат “Зара”» (в. Рэчкі Магілёўскага раёна). Пра гэта паведамілі ў Магілёўскім абласным цэнтры гігіены, эпідэміялогіі і грамадскага здароўя.

Падчас мерапрыемства насельніцтва зможа здаць кроў для вызначэння ўзроўню глюкозы і халестэрыну, прайсці электракардыяграфію, дыягностыку захворванняў органаў грудной клеткі з дапамогай мабільнага флюарографа «Пульмаскан», электронны маніторынг складу цела. На пляцоўках акцыі будуць вызначаць індэкс масы цела, кардыяваскулярную рызыку, вымяраць артэрыяльны і ўнутрывокавы ціск. Урачы агульнай практыкі, інфекцыяніст, тэрапеўт дадуць кансультацыі, у тым ліку па пытаннях, што тычацца хвароб сістэмы кровазвароту. У супрацоўнікаў ЗАТ «Агракамбінат “Зара”» і жыхароў населенага пункта будзе магчымасць зрабіць прышчэпку супраць грыпу, вакцынавацца супраць гепатыту В, адзёру, дыфтэрыі і слупняка. Тут таксама размясціцца выстава інфармацыйна-адукацыйных матэрыялаў. Арганізатары правядуць трэнінг па аказанні першай медыцынскай дапамогі.

Асноўная мэта акцыі – ранняе і своечасовае выяўленне хвароб сістэмы кровазвароту, зніжэнне смяротнасці сярод працаздольнага насельніцтва сельскай мясцовасці, павышэнне ўзроўню дасведчанасці па пытаннях прафілактыкі БСК, фарміраванне навыкаў кантролю АД, прапаганда здаровага ладу жыцця і своечасовага праходжання дыспансерызацыі.

Адной з самых актуальных праблем практычнай аховы здароўя і навуковай медыцыны з’яўляюцца хваробы сістэмы кровазвароту, якія адносяцца да самых распаўсюджаных прычын смяротнасці насельніцтва ва ўсіх краінах, падкрэслілі суразмоўцы. Сусветная арганізацыя аховы здароўя (СААЗ) выступіла з папярэджаннем аб тым, што ішэмічная хвароба сэрца атрымала шырокае распаўсюджванне і ўсё часцей закранае маладых людзей, што можа прывесці чалавецтва да вялікіх страт, калі такая тэндэнцыя не будзе змененая на аснове канцэнтраваных даследаванняў па вывучэнні прычын і прафілактыкі сардэчна-сасудзістых захворванняў.

Схільнасць да сардэчна-сасудзістых захворванняў, шкодныя звычкі, якія спрыяюць іх узнікненню, часта фарміруюцца ў маладым узросце, нярэдка яшчэ ў дзяцінстве. На жаль, пакуль мы маладыя, мы мала надаём увагі свайму здароўю.
Канцэпцыя нацыянальнай бяспекі Рэспублікі Беларусь вызначыла зніжэнне захворвання і смяротнасці насельніцтва, перш за ўсё ад хвароб сістэмы кровазвароту. Мерапрыемствы па прафілактыцы хвароб сістэмы кровазвароту ўключаны ў Дзяржаўную праграму «Здароўе народа і дэмаграфічная бяспека Рэспублікі Беларусь» на 2016-2020 гады.