Інфармацыйная сустрэча з прафесарска-выкладчыцкім складам і студэнтамі прайшла сёння ў МДУ імя А. А. Куляшова

З прафесарска-выкладчыцкім складам і студэнтамі МДУ імя А. А. Куляшова сустрэліся сёння старшыня Саюза пісьменнікаў Беларусі Аляксандр Карлюкевіч і доктар педагагічных навук, прафесар, заслужаны дзеяч навукі Рэспублікі Беларусь Аляксандр Радзькоў. Удзел у мерапрыемстве таксама прынялі начальнік галоўнага ўпраўлення ідэалагічнай работы і па справах моладзі Магаблвыканкама Кацярына Музычэнка і рэктар універсітэта Дзяніс Дук.

«Сёння мы пагаварылі як аб Усебеларускім народным сходзе – асноўныя пастулаты па тэме падрабязна выклаў у сваім выступленні Аляксандр Радзькоў, – так і аб рабоце Саюза пісьменнікаў Беларусі. Прыемна было, што аўдыторыі адгукнуліся на абмеркаванне тэмы і падобны жывы фармат зносін, – адзначыў Аляксандр Карлюкевіч. – Відаць, што педагогі і студэнты цікавяцца тым, што адбываецца навокал. Таму нядзіўна, што гутарка выйшла за межы тэмы Адзінага дня інфармавання.

Парадавала, што падчас абмеркавання літаратурнай дзейнасці ў Беларусі актыўна выяўлялася моладзь. У межах аднаго ўніверсітэта мы ўбачылі моцны творчы актыў. Мяркуючы па пытаннях, у іх ёсць цікавасць і да чытання, і да актуальных напрамкаў літаратуры, і да пытанняў прасоўвання кнігі, пошуку і ўдасканалення сябе ў якасці аўтараў. На мой погляд, кніга сёння па-ранейшаму – гэта выхавальнік, настаўнік. Прыемна, што разумее гэта і сучаснае пакаленне».

Юлія Таранава, фота Галіны Гаўрыловіч