Інклюзіўнае свята ўраджаю пройдзе ў Клічаве 10 кастрычніка

Рэгіянальнае інклюзіўнае свята ўраджаю «Багач» пройдзе ў Клічаве 10 кастрычніка. Пра гэта паведамілі ў аддзеле ідэалагічнай работы, культуры і па справах моладзі Клічаўскага райвыканкама.

Галоўнымі ўдзельнікамі свята стануць людзі з абмежаванымі фізічнымі магчымасцямі з усёй Магілёўскай вобласці. У праграме свята – паказ абраду «Багач». «Для беларускіх вёсак гэта заўсёды было вялікае свята. Калі жніво падыходзіла да канца, пакідалі нязжатай жменю жыта. Па-іншаму гэты кусцік называлі «дзедавай» або «Божай барадой». Пазней яго зажыналі, перавязвалі стужкай, прамаўлялі спецыяльную змову і з песнямі неслі дадому. Гэта і быў Багач. Яго заносілі ў двор тым, каму жадалі багацця і шчасця. Паводле павер’я, Багач забяспечваў ніву хлебам, а дом – шчасцем і дастаткам», – расказалі пра абрад у райвыканкаме.

Для гасцей свята падрыхтуюць музычныя выступленні, майстар-класы і лекцыю аб тым, як стаць рамеснікам. «Мы прапануем паспрабаваць сябе ў працы з саломкай, ткацтве габеленаў, кераміцы, разнастайных вышыўках, пляценні з папяровай лазы і тэхніцы «Канзашы». Мы спадзяёмся, што нашы майстар-класы дапамогуць камусьці знайсці не толькі хобі, але і сваё прызванне», – падкрэслілі арганізатары.

Свята ўраджаю для людзей з абмежаванымі фізічнымі магчымасцямі пройдзе ў Клічаўскім раёне другім разам. Летась яго ўдзельнікамі стала больш за 200 чалавек з Клічаўскага, Асіповіцкага, Бабруйскага і Кіраўскага раёнаў. Свята праходзіць у рамках ініцыятывы «Адраджэнне і правядзенне свята ўраджаю “Багач”». «Гэта свята не толькі адраджэнне і захаванне старажытнай беларускай традыцыі,але і магчымасць для людзей з абмежаванымі магчымасцямі паказаць свае таленты ў якасці вядучых, спевакоў, акцёраў і паспяховых рамеснікаў», – адзначылі ў райвыканкаме.

Ініцыятыва рэалізуецца органамі кіравання і самакіравання Клічаўскага раёна па праекце «Эфектыўнае ўзаемадзеянне, сучаснае кіраванне – устойлівы вынік» пры фінансавай падтрымцы пасольства Нідэрландаў у Варшаве.

БЕЛТА