Інтэрактыўная выстава «Партызаны Беларусі» адкрылася ў МДУ імя А. А. Куляшова. Відэа

Інтэрактыўная выстава «Партызаны Беларусі» адкрылася ў Магілёўскім дзяржаўным універсітэце імя А. А. Куляшова. Яна заснавана на дакументах унікальнага інтэрнэт-праекта выдавецкага дома «Беларусь сегодня» і Нацыянальнага архіва Рэспублікі Беларусь «Партызаны Беларусі», фотаматэрыялах Беларускага дзяржаўнага архіва кінафотафонадакументаў. У калекцыю ўвайшлі гістарычныя фатаграфіі, узнагародныя лісты і баявыя характарыстыкі партызан і падпольшчыкаў, якія дзейнічалі на тэрыторыі Беларусі падчас Вялікай Айчыннай вайны. Часткай выставы з’яўляецца інтэрактыўны стэнд, з дапамогай якога кожны наведвальнік можа паспрабаваць знайсці свайго гераічнага продка з ліку партызан і падпольшчыкаў.

Праект размясціўся ў зале бібліятэкі ўніверсітэта да 7 кастрычніка. Пасля змогуць пазнаёміцца з экспазіцыяй студэнты і выкладчыкі Беларуска-Расійскага ўніверсітэта, Беларускага дзяржаўнага ўніверсітэта харчовых і хімічных тэхналогій, Беларускай дзяржаўнай ордэнаў Кастрычніцкай Рэвалюцыі і Працоўнага Чырвонага Сцяга сельскагаспадарчай акадэміі. У далейшым выстава працягне свой шлях па ўстановах вышэйшай адукацыі краіны.

Аўтар відэа Вольга Емельянава