Інтэрактывы, лакацыі і актыўнасці чакаюць гасцей «Вытокаў» у Касцюковічах

Спартыўна-культурны фестываль «Вытокi. Крок ды Алiмпу» у бліжэйшыя выходныя, 18-19 жніўня, прымаюць Касцюковічы. Рабочую нараду па правядзенні спартыўна-культурнага фестывалю сабраў 15 жніўня намеснік старшыні Магаблвыканкама Валерый Малашка.

Для прадстаўнікоў рэспубліканскіх і рэгіянальных сродкаў масавай інфармацыі ў першы дзень фестывалю будзе арганізаваны прэс-тур, падчас якога яны змогуць пазнаёміцца з традыцыямі і перспектывамі развіцця Касцюковіцкага раёна. У праграме наведвання - мясцовы краязнаўчы музей, Беларускі цэментны завод і этна-пляцоўка з дэгустацыяй страў нацыянальнай кухні «Касцюковіцкія забавы».

Таксама ў гэты дзень адбудзецца семінар «Актуальныя пытанні падрыхтоўкі спартсменаў і шляхі іх вырашэння» з удзелам спецыялістаў БДУФК і Вышэйшай школы трэнераў, спартыўных арганізацый Магілёўскай вобласці. Акрамя таго, Беларуская алімпійская акадэмія арганізуе свой семінар-практыкум для педагогаў.

На Цэнтральнай плошчы горада бліжэй да вечара гасцей свята чакае мастацкі інтэрактыў «Гуляйце з намі - малюйце самі», арганізаваны галерэяй «АртХаос». Тэма работ у Касцюковічах – «Гульні з жырафам». Гульнявое поле складаецца з некалькіх гульняў, якія можна праходзіць адну за адной, рухаючыся ў напрамку стрэлак. Таксама можна гуляць у кожную гульню па асобнасці. Перамагае той, хто ў любой гульні акажацца першым.

Вячэрнюю праграму фестывалю адкрые спектакль тэатра-студыі кінаакцёра «Брыялін». Арганізатары прадставяць працу вядомага творчага калектыву, якая з поспехам праходзіць у Мінску. Завершыцца першы дзень паказам вядомай спартыўнай стужкі ў кінатэатры пад адкрытым небам.

У другі дзень фестывалю спартыўныя аб'екты раёна наведае кіраўніцтва НАК Беларусі, Мінспорту і Магілёўскай вобласці.

Свята працягнецца выставай-продажам «Беларускія брэнды» на пляцоўцы ФАЦ Касцюковічы, дзе будзе прадстаўлена прадукцыя беларускіх прадпрыемстваў, у тым ліку, распрацаваная з удзелам НАН Беларусі.

У 12.45 стартуе алімпійскі забег, у якім, паводле папярэдняй інфармацыі, чакаецца ўдзел каля 500 хлопчыкаў і дзяўчынак.

Пасля цырымоніі ўрачыстага адкрыцця пачнецца адна з самых чаканых актыўнасцей - алімпійскі квэст на пляцоўцы каля гарадскога ФАЦ. Кожны жадаючы ва ўзросце да 14 гадоў атрымае магчымасць з 13.00 да 17.00 узяць удзел у спартыўных конкурсах, праверыць свае магчымасці ў розных відах спорту, выканаць заданні і атрымаць каштоўныя прызы.

Актыўнасці будуць арганізаваны на 30 пляцоўках па такіх відах спорту, як барацьба, бокс, біятлон, веласпорт, валейбол, баскетбол, лёгкая атлетыка, кулявая стральба, цяжкая атлетыка, настольны тэніс, конны спорт, каратэ, хакей з шай стральба з лука, тэніс, гандбол, міні-гольф, турнір па брэйк-дансе, а таксама ўдзельнікаў чакаюць і іншыя актыўнасці. Свой стэнд плануе выставіць Міністэрства па надзвычайных сітуацыях. У Касцюковічы прыедзе і гоначны грузавік каманды «МАЗ-СПОРТаўта».

На «Вытоках» будзе прадстаўлена новая ў гэтым сезоне цікавая лакацыя – «Гульні нашага двара» ў раёне ФОЦ Касцюковічы. Якая мяркуе праходжанне пяці этапаў квэста – «гумка», «класікі», «бульба», стральба з рагаткі і іншыя, за якія можна атрымаць памятныя сувеніры ад арганізатараў.

Таксама ў ФАЦ пройдзе фінал абласнога этапу новага інтэлектуальна-адукацыйнага праекту «Вытокi. Quiz». У конкурсе прымуць удзел каманды з кожнага раёна Магілёўскай вобласці. Праект працягнецца ў кожным з гарадоў, дзе адбудуцца «Вытокi-2023».

Забаўляльная праграма фестывалю 19 жніўня працягнецца прэзентацыяй калекцый адзення «Роднае-моднае» беларускіх прадпрыемстваў, дызайнераў і прадпрымальнікаў.

У гэтым годзе ў культурнай праграме «Вытокаў» праходзіць новы конкурс песеннага тэксту «Вершы пра галоўнае». Журы ўжо вызначыла пераможцу ў Магілёўскай вобласці. На тэкст аўтара прафесійны кампазітар напіша песню, якая будзе выканана на фестывалі.

На галоўнай сцэнічнай пляцоўцы вызначаць найлепшых маладых выканаўцаў у вакальным конкурсе. Лаўрэаты атрымаюць дыпломы і прызы, а таксама прымуць удзел у майстар-класах вядучых настаўнікаў краіны.

Вячэрні гала-канцэрт на пляцоўцы каля раённага Цэнтра культуры адбудзецца з удзелам папулярных артыстаў беларускай эстрады а 20.00. Завершыцца свята маляўнічым феерверкам у 23.00 і дыскатэкай.

Потым спартыўная эстафета «Вытокаў» перайдзе да Барысава.

Арганізатарамі фестывалю «Вытокі» з'яўляюцца Нацыянальны алімпійскі камітэт Рэспублікі Беларусь, Федэрацыя прафсаюзаў Рэспублікі Беларусь, ТАА «АртХаос» і ТАА «БелБрэндАўдыт».

Рэд., фота Юліі Таранавай