Ірына Раінчык сустрэлася з актывам маладзёжнай школы «Лідэр» Чавускага раёна

Старшыня абласнога Савета дэпутатаў Ірына Раінчык сустрэлася сёння з актывам маладзёжнай школы «Лідэр» Чавускага раёна. Для школьнікаў была арганізавана аглядная экскурсія з наведваннем выставачнай экспазіцыі музея Магілёўскага аблвыканкама, залы прыёму дэлегацый і канферэнц-залы. Маладых людзей пазнаёмілі з гісторыяй і прызначэннем кожнай з аўдыторый.

У зале селектарных нарад школьнікам паказалі відэаролік аб дасягненнях Магілёўшчыны, а пасля Ірына Раінчык паразмаўляла з моладдзю аб працы абласнога Савета дэпутатаў:

«Наша праца будуецца на заканадаўчай базе. І самы галоўны дакумент - гэта Канстытуцыя Рэспублікі Беларусь, дзе прапісаны асноўныя напрамкі развіцця нашай дзяржавы. У 2022 годзе ў Асноўны Закон краіны былі ўнесены змяненні і дапаўненні, якія ў далейшым прынялі на рэспубліканскім рэферэндуме. Закранулі яны і работу дэпутацкага корпуса.

Сёння працуе 28-е скліканне абласнога Савета дэпутатаў. Усе дэпутаты абіраліся, паводле дзейнай на той момант Канстытуцыі, на чатыры гады. У абноўленай Канстытуцыі закладзены ўжо іншыя нормы. У 2024 годзе ў адзіны дзень галасавання, які пройдзе ў краіне ўпершыню, будуць абірацца дэпутаты ўсіх узроўняў. Гэта вельмі адказная выбарчая кампанія. На сёння дзяржавай рэгламентуюцца ўсе нарматыўна-прававыя дакументы, у тым ліку Выбарчы кодэкс, каб яна прайшла арганізавана і ў межах нашага заканадаўства».

Ірына Раінчык расказала аб напрамках дзейнасці і ўладкаванні пяці пастаянных камісій абласнога Савета, аб рабоце Маладзёжнага парламента, створанага пры Савеце ў 2020 годзе, а таксама абласной асацыяцыі мясцовых Саветаў дэпутатаў, аб узаемадзеянні з грамадскімі арганізацыямі, рэалізуемых праектах і ініцыятывах.

«Шмат можна расказваць пра нашу працу. Але хацелася б адзначыць галоўнае, што дэпутацкі корпус вобласці - гэта адзіная каманда з органамі выканаўчай улады, якая накіравана на развіццё нашага рэгіёну, жыццезабеспячэнне жыхароў нашага рэгіёну. І тыя вынікі, з якімі мы пазнаёмілі вас сёння, усё гэта вынік зладжанай каманднай працы», - падкрэсліла яна.

Кіраўнік дэпутацкага корпуса таксама пацікавілася ў рабят, як яны ўяўляюць сабе вобраз дэпутата і яго дзейнасць, спытала і пра асабістыя планы маладых людзей, выбар прафесіі.

«Маладзёжнай палітыцы ў нашай краіне надаецца вельмі вялікая ўвага. Вы ведаеце, што кіраўнік дзяржавы пастаянна гаворыць аб тым, што вы - наша будучыня. І ўсё залежыць толькі ад вас. Як вы будзеце выбудоўваць сваё жыццё, якімі будзеце бачыць свае мэты і наколькі будзеце мэтанакіраванымі, залежыць і ваша асабістая будучыня, і будучыня нашага Прыдняпроўскага краю, нашай краіны», - рэзюмавала яна.

Звярнуўся да хлопцаў і першы сакратар Магілёўскага абкама БРСМ Аляксандр Саксонаў:

«Чавускі раён па выніках працы моладзевай арганізацыі ў 2022 годзе стаў лепшым у вобласці. Я ўпэўнены, што ў гэтым ёсьць заслуга кожнага з прысутных. І хачу нацэліць кожнага на тое, што калі ў вас ёсць нават маленькая ініцыятыва, не варта баяцца, трэба быць больш актыўнымі і прапаноўваць, агучваць свае думкі. А мы зможам дапамагчы вам іх развіць, аформіць і ўвасобіць. Так, з 8 красавіка па 8 мая будзе рэалізоўвацца праект маладзёжных ініцыятыў, у якім змогуць узяць удзел усе ахвочыя. Пераможца атрымае фінансавую падтрымку. Гэта добрая магчымасць праявіць сябе.

На сваім досведзе жадаю сказаць, што ўсё магчыма і ўсё ў вашых руках. Проста на кожным этапе жыцця неабходна поўнасцю аддавацца сваёй справе. Цяпер вы навучэнцы ўстаноў адукацыі і вам па сілах добра вучыцца, займацца грамадскай дзейнасцю, валанцёрскай працай і заставацца прыстойнымі людзьмі. Далей рушыць услед выбар прафесіі і, хто ведае, магчыма ўжо праз пэўную колькасць гадоў ужо вы будзеце праводзіць падобнае мерапрыемства».

Дапоўніў лідэра БРСМ і старшыня Маладзёжнага парламента пры абласным Савеце дэпутатаў Міхаіл Пагоцкі:

«Гаворачы аб ініцыятывах і мерапрыемствах, хацеў бы адзначыць, што Чавускі раён ужо 5 красавіка будзе прымаць нашых прадстаўнікоў у сябе. Мы правядзем навучальнае мерапрыемства па фармаванні ініцыятыў у гатовыя праекты, пакажам лепшыя распрацоўкі. Сустрэнемся з пераможцам маладзёжных ініцыятыў мінулага года з горада Крычава. Пагутарым і абмяняемся досведам працы».

Падзяліліся сваімі ўражаннямі і ўдзельнікі сустрэчы. Васьмікласнік СШ №1 горада Чавусы Аляксей Панамароў распавёў, што яму цікавая праца Моладзевага парламента і сённяшняя сустрэча толькі ўмацавала жаданне ў будучыні папоўніць яго склад: «Сёння нам правялі экскурсію па Магілёўскім аблвыканкаме, уразіла як маштабнасць самога будынка, так і афармленне залаў для афіцыйных мерапрыемстваў. . Скарыстаўся магчымасцю пастаяць за трыбунай для выступленняў, сесці за стол перагавораў, дзе заключаюцца важныя пагадненні. І, калі сапраўды, адчуў вельмі вялікую адказнасць. Але мне спадабалася».

Дзевяцікласнік СШ №1 горада Чавусы Ілля Далецкі адзначыў, што ўпершыню ўдзельнічае ў такім мерапрыемстве: «Мне спадабалася і экскурсія па такім значным аб'екце, і тое, як праходзілі зносіны. Запомніцца асаблівая атмасфера залаў. Я ўбачыў, як усё сур'ёзна зроблена.

І хаця я больш творчы чалавек, але даведацца, як арганізуецца праца органаў дзяржаўнай улады было цікава і пазнавальна».

Настаўніца Асінаўскай СШ Чавускага раёна Ганна Кіяшка падзякавала за арганізацыю пазнавальнага мерапрыемства і расказала пра свой вопыт работы ў складзе Маладзёжнага парламента: «Дзеці вучацца на прыкладах дарослых. І такая экскурсія - вельмі карысная для іх. Яны бачаць пэўную мэту і з'яўляецца стымул імкнуцца да яе - старанна вучыцца, паступіць у ВНУ, зрабіць нешта добрае для месца, дзе жывеш.

У нас у рэгіёне шмат ініцыятываў ад моладзі, іх заўсёды разглядаюць, падтрымліваюць. Ніхто не застаецца ўбаку, не ігнаруе. Я вельмі рада быць маладым парламентарыем. Мы абмяркоўваем пытанні, ідэі, ствараем праекты, якія нам па сілах рэалізаваць. Напрыклад, я працую ў сельскай школе, і свае ініцыятывы накіроўваю на тое, каб у гэтым месцы нешта паляпшаць, ствараць. І радуе, што дзеці заўсёды ахвотна адгукаюцца на нейкія сумесныя справы. Калі ўсё атрымліваецца, жадаецца рабіць яшчэ і яшчэ. Прыемна, што твае ідэі аказваюцца карыснымі, іх заўважаюць і шануюць».

На памяць аб сустрэчы школьнікам уручылі невялікія сувеніры.

Юлія Таранава, фота Галіны Гаўрыловіч