Калектывы і майстры народных мастацкіх рамёстваў чатырох краін прадэманструюць сваю творчасць на свяце «Александрыя збірае сяброў»

Калектывы і майстры народных мастацкіх рамёстваў усіх рэгіёнаў Беларусі і горада Мінска прадэманструюць сваю творчасць на выставе-кірмашы «Александрыйскі кірмаш», якая будзе праходзіць на працягу двух дзён на свяце «Купалле» ў Шклоўскім раёне. Таксама плануецца ўдзел прадстаўнікоў Расіі, Украіны і Літвы, паведамілі ў Магілёўскім абласным метадычным цэнтры народнай творчасці і культурна-асветнай працы.

Сёлета тэматыкай выставы-кірмашу, якая размесціцца на чатырох паралельных радах, стане «Свята нацыянальнага касцюма». Праграма першага дня пачнецца ў 14.00. Наведвальнікаў экспазіцыі чакаюць інтэрактыўныя праграмы, выставы-продажы вырабаў майстроў, выступленні творчых калектываў у фармаце творчага батла, конкурсы, народныя гульнявыя атракцыёны, розыгрышы купальскіх латарэй і многае іншае.

На прэзентацыйнай пляцоўцы Магілёўскай вобласці можна будзе пазнаёміцца з элементамі нематэрыяльнай культурнай спадчыны, занесенымі ў Дзяржаўны спіс аб’ектаў гісторыка-культурнай каштоўнасці Рэспублікі Беларусь: тэхналогіяй стварэння ганчарных вырабаў майстрамі Бабруйскага раёна, пляценнем саламяных павукоў у Быхаўскім раёне, творчасцю майстроў-шапавалаў і традыцыяй вырабу лапцей у Дрыбінскім раёне.

На тэматычнай экспазіцыі «Спадчына традыцый Падняпроўя» прадставяць старадаўнія ткацкія станкі і працу ткачых Магілёўскай вобласці. Акрамя таго, тут размесцяцца майстар-цэнтры па народных рамёствах, дзе будуць працаваць найлепшыя майстры Беларусі: кавалі, дрэўшчыкі, лазапляцельшчыкі і іншыя.

Суразмоўцы дадалі, што падчас адкрыцця свята «Александрыя збірае сяброў» адбудзецца парад-дэфіле рэканструяваных касцюмаў нацыянальных строяў Беларусі і краін-удзельніц, пройдзе абласны конкурс-выстава «Беларускі народны касцюм Магілёўшчыны». Удзельнікі прадставяць работы ў дзвюх намінацыях: «Найлепшы традыцыйны рэканструяваны касцюм» і «Найлепшы этнакасцюм». Выстава кожнай катэгорыі будзе аформлена асобнымі экспазіцыямі на «Свяце нацыянальнага касцюма». Тут жа прадэманструе свае нацыянальныя касцюмы кожная вобласць Сінявокай. На кірмашы будуць шырока прадстаўлены аксесуары – сумкі, паясы, нагрудныя ўпрыгожванні, галаўныя ўборы і многае іншае.

У другі дзень фестывалю, 12 ліпеня, «Александрыйскі кірмаш» будзе працаваць да 15.00.

Рэспубліканскае свята «Купалле» («Александрыя збірае сяброў») адбудзецца ў Шклоўскім раёне 11–12 ліпеня. Сёлета яно пройдзе пад патранатам ЮНЕСКА.