Каля 8200 дзяцей прайшлі аздараўленне падчас зімовых канікулаў на Магілёўшчыне

На базе ўстаноў адукацыі падчас зімовых канікулаў працавалі 280 лагераў з дзённым знаходжаннем, у якіх аздаравіліся больш за 7,5 тысячы дзяцей. Каля 700 школьнікаў праходзілі аздараўленне на базе спартыўных устаноў.

Дзеці бралі ўдзел у навагодніх паказах, хадзілі на выставы, экскурсіі, наведвалі музеі, установы культуры. У час канікулаў працавалі ўстановы дадатковай адукацыі, аб'яднанні па інтарэсах. Кожная ўстанова адукацыі распрацавала сваю праграму на вакацыі, разлічаную мінімум на шэсць дзён. Для бацькоў дапамога педагогаў была добрай падмогай, каб іх дзіця было пад наглядам і зарадзілася пазітыўнымі эмоцыямі ад яркіх уражанняў, набралася сіл для паспяховай вучобы.