Каля Br68 тыс. было сабрана ў Магілёве падчас тэлемарафона «Сагрэем дзіцячыя сэрцы»

Каля Br68 тыс. было сабрана падчас дабрачыннага тэлемарафона «Сагрэем дзіцячыя сэрцы», які праходзіў сёння ў эфіры тэлеканала «Беларусь 4 Магілёў». Пра гэта расказала дырэктар Магілёўскага абласнога аддзялення Беларускага дзіцячага фонду Ірына Фісюк.

«Дзякуючы тэлемарафону, які сёлета праходзіў сёмым разам, мы сабралі каля Br68 тыс. Гэта больш, чым летась. Тады мы змаглі сабраць каля Br62 тыс. Усё больш людзей падключаецца да нашай дабрачыннай акцыі. Гэта сведчыць пра тое, што ў нашым рэгіёне жывуць неабыякавыя людзі, якія не могуць прайсці міма дзяцей, што маюць патрэбу ва ўвазе і падтрымцы», – адзначыла Ірына Фісюк.

Тэлемарафон праходзіў у прамым эфіры абласнога тэлеканала на працягу шасці гадзін. У гэты час гасцямі студыі сталі каля 50 чалавек: прадстаўнікі арганізацый і прадпрыемстваў, грамадскіх аб’яднанняў, бізнесу і жыхары рэгіёна.

«Усе грашовыя сродкі, атрыманыя падчас тэлемарафона, будуць накіраваныя на тое, каб задаволіць усе заяўкі: гэта і закупка медыцынскага і рэабілітацыйнага абсталявання, уладкаванне вулічных гульнявых пляцовак у спецыялізаваных установах для дзяцей з асаблівасцямі фізічнага развіцця. Акрамя гэтага, грошы будуць накіраваныя і на адрасную дапамогу», – адзначыла Ірына Фісюк.

Арганізатарамі тэлемарафона выступілі Магілёўскае абласное аддзяленне Беларускага дзіцячага фонду, тэлерадыёкампанія «Магілёў» пры падтрымцы абласнога выканаўчага камітэта.

БЕЛТА