Камфортна і сучасна. У Магілёве пасля рэканструкцыі адкрылі праспект Дзімітрава

У Магілёве пасля рэканструкцыі адкрылі праспект Дзімітрава. Рамонтныя работы тут завяршылі раней запланаваных тэрмінаў.

Аблічча знаёмага магіляўчанам праспекта змянілася цалкам. «Тут створаны камфортныя ўмовы для вадзіцеляў: абсталяваны па тры паласы ў кожны бок. Зрабілі з'езды, пешаходныя сувязі. І што самае важнае - падчас рамонтных прац улічвалі інтарэсы жыхароў горада Магілёва і гасцей абласнога цэнтра», - распавёў падчас урачыстага адкрыцця старшыня Магілёўскага гарвыканкама Аляксандр Студнеў.

Участак рэканструкцыі праспекта Дзімітрава склаў больш за 2,6 км. На абноўленым праспекце з'явіліся зручныя веладарожкі - яркія і абазначаныя. Для бяспекі веласіпедыстаў - у пешаходных пераходаў на іх устанавілі штучныя няроўнасці - новаўвядзенне, якое прызначана для таго, каб веласіпедысты таксама зніжалі хуткасць пры пад'ездзе да пешаходных пераходаў. А каб пешыя прагулкі па праспекце былі ў задавальненне - абсталяваны месцы для адпачынку з лавачкамі. Тут устанавілі сучасныя і зручныя прыпыначныя павільёны..

«Вельмі радасна, што гарадзкія і абласныя ўлады зьвярнулі ўвагу на дарожную праблему. Мы бачым, што з кожнай вуліцай і дваровай тэрыторыі наш горад становіцца ярчэйшым і лепшым, - распавёў намеснік генеральнага дырэктара па эканоміцы ААТ «ДСТ №3» Леанід Захаркевіч. - Тут мы зрабілі не толькі асноўны праезд. Пашыраны стаянкі, зроблены мясцовыя праезды, добраўпарадкавалі тэрыторыю і дзіцячыя гульнявыя пляцоўкі».

Ва ўрачыстай цырымоніі адкрыцця праспекта прыняў удзел намеснік старшыні Магілёўскага аблвыканкама Генадзь Дзенгалёў. Ён расказаў аб тым, што на рэканструкцыю праспекта было накіравана Br27 млн. «Пры падтрымцы Магілёўскага аблвыканкама, Банка развіцця мы змаглі атрымаць гэтыя грошы і правесці ўсе неабходныя работы раней за ўстаноўленыя тэрміны», - адзначыў ён.

Па словах Генадзя Дзенгалёва, горад Магілёў і ўвесь рэгіён змяняюцца на вачах. «Будоўляў вельмі шмат. Мы плануем да канца года адкрыць яшчэ 19 аб'ектаў. У верасні адкрыем апошнюю частку будаўніцтва дарогі-дублера ў Магілёве, мы плануем 2 школы і дзіцячы сад, бальніцу і многае іншае, - расказаў намеснік старшыні аблвыканкама. - Мы пачынаем і новае будаўніцтва аб'ектаў: школы, дарогі. У гэтым годзе яшчэ ўвядзем праспект Пушкінскі. У Бабруйску пачынаем будаваць новы шпіталь па тыпе той, што на сённяшні дзень узводзіцца ў Магілёве. Пералічыць усё немагчыма. Магілёўскі аблвыканкам укладвае вялікую колькасць грашовых сродкаў у будаўніцтва аб'ектаў сацыяльнай сферы, дарожнае будаўніцтва і ўзвядзенне аб'ектаў сельскай гаспадаркі».

БЕЛТА