Канцэрты і выстава – цікавую праграму падрыхтаваў для магіляўчан цэнтр народнай творчасці

Цікавую культурную праграму для гараджан падрыхтаваў Магілёўскі абласны метадычны цэнтр народнай творчасці і культурна-асветнай работы. Пасля галасавання на выбарах Прэзідэнта Беларусі на сваіх выбарчых участках магіляўчан запрашаюць пазнаёміцца з дасягненнямі народнай творчасці рэгіёна.

З 21 па 26 студзеня ў фае цэнтра на працягу дня будзе працаваць выстава майстроў Магілёўскай вобласці «Беларускі цуд рукамі майстроў». Экспазіцыя пазнаёміць наведвальнікаў з багатай спадчынай рэгіёну. У вітрынах выставы будуць прадстаўлены традыцыйныя віды мастацкіх рамёстваў: лаза- і саломапляценне, керамічныя вырабы, ткацтва, вышыўка, тэкстыльная лялька, цацкі з ваты, бондарства, кавальская справа, роспіс па дрэве, роспіс па шкле, выцінанка і іншыя.

У канцэртнай зале можна будзе стаць гледачом праграм «У будучыні наша сіла» і «Святыня мая Беларусь» народнай арт-групы «Магілёўцы», канцэртнай праграмы «Беларусь мая любоў, маё багацце» заслужанага калектыву Рэспублікі Беларусь ансамбля песні і танца «Медуніца» КК «Магілёўская абласная філармонія» і праекта «Маладая Беларусь» прадзюсерскага цэнтра «Ступені» КК «Магілёўская абласная філармонія».

 СБ