Рус Бел Eng 中文

Кантракты на $750 млн плануецца заключыць падчас Форума рэгіёнаў Беларусі і Расіі

Кантракты на $750 млн плануецца заключыць падчас VII Форума рэгіёнаў Беларусі і Расіі, які пройдзе 28–29 верасня ў Мінску і Мінскай вобласці. Пра гэта расказаў намеснік старшыні Савета Рэспублікі, сустаршыня аргкамітэта з беларускага боку Анатоль Ісачанка падчас сумеснага пасяджэння арганізацыйных камітэтаў па падрыхтоўцы і правядзенні форуму ў рэжыме відэаканферэнц-сувязі, як паведамілі ў прэс-службе верхняй палаты беларускага парламента.

Паводле слоў Анатоля Ісачанкі, такая сума крыху вышэйшая за ўзровень леташняга форуму. «Найбольш буйны кантракт – паміж ААТ «Магілёўхімвалакно» і рускім прадпрыемствам «Авангард» на суму звыш $30 млн, які будзе падпісаны на пленарным пасяджэнні», – сказаў ён.

Сёлета фармат правядзення форума некалькі змяніўся. «У сувязі з каранавіруснай сітуацыяй пасяджэнні секцый і шэраг іншых мерапрыемстваў у першы дзень пройдуць у відэафармаце. У другі дзень мерапрыемства працягнецца ў рэжыме афлайн», – адзначыў Анатоль Ісачанка.

VII Форум рэгіёнаў Беларусі і Расіі будзе прысвечаны тэме «Гістарычная спадчына Вялікай Перамогі як аснова развіцця сацыяльна-эканамічных і духоўных сувязей народаў Беларусі і Расіі». Запланавана правядзенне пяці секцый па некалькіх тэматычных напрамках: парламенцкае супрацоўніцтва, сумесныя эканамічныя праекты, подзвіг савецкага народа ў Вялікай Айчыннай вайне, супрацьдзеянне гераізацыі нацызму, павышэнне актыўнасці сельскай моладзі. Пройдуць таксама сумеснае пасяджэнне дзелавых саветаў Беларусі і Расіі і экспертная сесія высокага ўзроўню на тэму «Адукацыя як аснова гістарычнай памяці і далейшага інтэграцыйнага развіцця Саюза Беларусі і Расіі».

Пытанні рэгіянальнага супрацоўніцтва, выканання дакументаў, прынятых на папярэдніх форумах, развіцця навукова-тэхнічнага супрацоўніцтва дзвюх краін разгледзяць на пасяджэнні Міжпарламенцкай камісіі Савета Рэспублікі Нацыянальнага сходу Беларусі і Савета Федэрацыі Федэральнага сходу Расіі па міжрэгіянальным супрацоўніцтве.

Цэнтральнай падзеяй форума стане пленарнае пасяджэнне, на якім будуць падведзены вынікі працы секцый, абмеркаваны ключавыя пытанні і прыняты выніковы дакумент. Падчас пленарнага пасяджэння і сустрэчы старшыні Савета Рэспублікі і Старшыні Савета Федэрацыі з кіраўнікамі рэгіёнаў Беларусі і суб’ектаў Расійскай Федэрацыі запланавана падпісанне пагадненняў аб супрацоўніцтве і камерцыйных кантрактаў.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая