Казкі на падушках можна паслухаць у Чавусах

Мяккі падыход да вывучэння беларускай мовы і гісторыі роднага краю знайшлі ў Чавускім гісторыка-краязнаўчым музеі. Тут стартаваў праект для дзяцей «Казкі на падушках».

На яго стварэнне музейныя супрацоўнікі не выдаткавалі ні капейкі. Аказалася, што ў музейных фондах ёсць усё неабходнае, каб народная беларуская казка ператварылася ў інтэрактыўную гульню, дзе казку можна не толькі слухаць, але і пакратаць рукамі.

Новы праект «Казкі на падушках» нарадзіўся са старых музейных штор. Тканіны хапіла на 27 мяккіх сядзенняў. На іх неабавязкова толькі сядзець. Такі мяккі і хатні падыход дапамагае настроіцца на патрэбны лад. Наперадзе не ўрок, не заняткі, а сапраўдная казка, прычым на беларускай мове.

Звычайна дзеці дашкольнага ўзросту прыходзяць сюды па пятніцах. У дзіцячых садках гэты дзень тыдня прысвячаюць роднай мове, і экскурсія ў музей удала ўпісваецца ў расклад малых.

ТРК «Магілёў»