Кіраўнік Магілёўскага абласнога тэатра лялек узнагароджаны медалём Францыска Скарыны

Дырэктар Магілёўскага абласнога тэатра лялек Уладзімір Андрэенка падзяліўся планамі на новы тэатральны сезон. 3 ліпеня кіраўнік установы культуры «Заслужаны калектыў Рэспублікі Беларусь “Магілёўскі абласны тэатр лялек”» узнагароджаны медалём Францыска Скарыны. Дзяржаўныя ўзнагароды дзеячам культуры у Дзень Незалежнасці ўручыў Прэзідэнт.

Уладзімір Андрэенка лічыць, што лялечны тэатр для дзяцей – гэта не толькі забаўка, ён мае вялікае выхаваўчае і развіваючае значэнне, далучае дзіця да духоўных каштоўнасцей:

– Як бы высакапарна гэта ні гучала, мы прышчапляем дзіцяці любоў да Радзімы, знаёмім з гісторыяй, нацыянальнымі традыцыямі, вучым паважаць старэйшых. На мой погляд, мы трохі ўпусцілі моладзь, спахапіліся, што дрэнна выхавалі. У нас у тэатры ёсць малая сцэна, дзе мы паказваем спектаклі для самых маленькіх гледачоў – ад 2-х гадоў. Вечная тэма – дабро і зло. У новым тэатральным сезоне да нас прыходзіць новы рэжысёр. І мы пачнём працаваць над новым праектам «Легенда пра Машэку». Спектакль паводле апавядання класіка беларускай літаратуры Уладзіміра Караткевіча «Сіняя-сіняя» павязем у жніўні на фестываль «Казачны балаганчык скамароха» ў Томск. У верасні на фестывалі ў Брэсце «Белая вежа» пакажам спектакль «Дзіўныя авантуры паноў Кубліцкага ды Заблоцкага». За апошнія гады мы вельмі актыўна ўдзельнічалі ў фестывалях, бо гэта магчымасць заявіць пра сябе, конкурсы стымулююць творчы пошук.

Магілёўскі абласны тэатр лялек адзначыў 45-гадовы юбілей. Дырэктар Уладзімір Андрэенка адзначае асноўныя дасягненні мінулага тэатральнага сезона:

– У 2021 годзе тэатру прысвоена ганаровае званне «Заслужаны калектыў Рэспублікі Беларусь». Глядач ужо змог ацаніць нашы прэм’еры: «Маленькі прынц», «Грынч – выкраданне Новага года», «Марыйка ў казачнай краіне». У рэпертуары тэатра 48 спектакляў. Ёсць тыя, якія чакаюць свайго часу на паліцы, а ёсць «працоўныя конікі». Да прыкладу, «Марозка» не сыходзіць са сцэны 20 гадоў. Трупа маладая працэнтаў на 80, але мы чакаем да сябе ў наступным годзе папаўненне – тры акцёры па размеркаванні. Два нашы маладыя спецыялісты атрымалі арэндныя кватэры, на чарзе яшчэ двое. Наш тэатр адзін з найлепшых у вобласці па запаўняльнасці глядзельнай залы – 68,8 працэнта. За 45-гадовую гісторыю тэатра наш глядач нам верны: тыя, хто вырас на нашых спектаклях, сёння прыводзяць сваіх дзяцей. І мы, у сваю чаргу, не падвядзём чаканні нашых любімых гледачоў: у новым сезоне будуць прэм’еры і вечная магія казкі.

 СБ