Рус Бел Eng 中文

Клініка-дыягнастычную лабараторыю Махаўскай амбулаторыі агульнай практыкі адкрылі ў Магілёўскім раёне

Клініка-дыягнастычная лабараторыя Махаўскай амбулаторыі агульнай практыкі адкрылася сёння ў Магілёўскім раёне. Зараз пацыенты медустановы (а гэта больш за 1420 чалавек з 23 населеных пунктаў) змогуць здаць тут асноўныя аналізы.

– Магілёўшчына ўзяла курс на тое, каб кожны жыхар раёна або сельскай мясцовасці мог атрымаць кваліфікаваную спецыялізаваную дапамогу ў буйной медустанове абласнога цэнтра, – адзначыў намеснік галоўнага ўрача па медыцынскай экспертызе і рэабілітацыі Магілёўскай Цэнтральнай паліклінікі Аляксей Давыдаў, – але ж сур’ёзныя ўмяшальніцтвы медыкаў патрабуюцца далёка не ва ўсіх выпадках. Большасць пытанняў можа выдатна вырашыць падобная амбулаторыя. З адкрыццём лабараторыі якасная медыцынская дапамога наблізілася да людзей.

Жыхаркі Махава Антаніна Аўраменка і Галіна Кашэвіч у адзін голас кажуць, што адкрыццё новага аб’екта стала для іх сапраўдным падарункам:

– Трэба разумець, што 40% насельніцтва нашага аграгарадка, як і мы, – пенсіянеры з хранічнымі захворваннямі, якія маюць патрэбу ў рэгулярных абследаваннях. Раней здаваць аналізы мы ездзілі ў паліклініку № 11 Магілёва. Дарога ў 30 кіламетраў, ды яшчэ і з перасадкай, давалася нялёгка. Дабіраючыся рэйсавым аўтобусам, мы часам не паспявалі здаць кроў своечасова, таму даводзілася падстрахоўвацца: прыязджаць загадзя і начаваць у знаёмых ці дабірацца рана спадарожнымі машынамі, а ў нашым узросце гэта сапраўднае выпрабаванне.

Правядзенне асноўных аналізаў на месцы адаб’ецца на карысць ранняй дыягностыкі, дазволіць кантраляваць хранічныя захворванні, выключыць у чалавека, які звярнуўся, вострыя паталогіі, удакладніла загадчык амбулаторыяй Інга Кастрова. Ёсць у медустановы і анлайн-сувязь з Магілёвам – усе даныя ўносяцца ў электронную карту пацыента.

Частку памяшканняў Махаўская амбулаторыя арандуе ў мясцовым Доме культуры, у тым ліку два кабінеты для лабараторыі гематалагічных і агульнаклінічных даследаванняў. Магілёўскі райвыканкам выдзеліў 8,8 тысячы рублёў на рамонт памяшканняў, яшчэ 4,8 тысячы – на набыццё мэблі, абсталявання і расходных матэрыялаў.

У сярэднім за змену лабараторыя зможа прымаць 10–15 чалавек, але ў залежнасці ад эпідэміялагічнай сітуацыі або планавых абследаванняў цэлых груп людзей гэта лічба можа павялічыцца.

Першы час весці выязны прыём 1–2 дні ў тыдзень будзе Таццяна Кураленка. Графік для фельчара-лабаранта паліклінікі № 11 Магілёва зацвердзяць у найбліжэйшы час. Ужо ў жніўні пасаду на пастаяннай аснове зойме малады спецыяліст.

СБ

 

Пры выкарыстанні матэрыялаў актыўная гіперспасылка на mogilev-region.gov.by абавязковая