Клопат і ўвага да медыкаў дапамагаюць у барацьбе з вірусам – урач-інфекцыяніст

Клопат і ўвага да медыкаў дапамагаюць у барацьбе з віруснай інфекцыяй. Такое меркаванне выказала ўрач-інфекцыяніст Магілёўскай паліклінікі № 4 Вольга Сівапляс.

«Падтрымка калектыву, даплаты ад дзяржавы, поўнае забеспячэнне медыкаў сродкамі індывідуальнай абароны – на ўсіх узроўнях нам аказваецца асаблівая ўвага. Мы ў сваю чаргу сумленна і граматна выконваем сваю працу», – сказала Вольга Сівапляс.

У паліклініцы № 4 арганізаваны дзве кантактныя групы ўрачоў з памочнікамі, якія праводзяць забор назафарынгеальных мазкоў у кантактаў першага ўзроўню і пацыентаў з падазрэннем на COVID-19. У дзень адна кантактная група выязджае ў сярэднім да дваццаці пацыентаў. Як паведамілі ў адміністрацыі ўстановы аховы здароўя, бывалі дні, калі наведвалі і больш за 40 чалавек.

«Яшчэ паўтара месяца таму наш знешні выгляд шакіраваў людзей. Цяпер ужо спакайней рэагуюць на ўрачоў у поўнай абароне. Людзі ведаюць і разумеюць эпідэміялагічную сітуацыю. І гэта вельмі важна, каб захаваць не толькі сваю бяспеку, але і клапаціцца пра здароўе блізкіх», – звярнула ўвагу Вольга Сівапляс.

Сродкаў індывідуальнай абароны ў паліклініцы, паводле яе слоў, дастаткова, ёсць запас дэзынфікуючых сродкаў, антысептыкаў. «З самага пачатку праблем з гэтым не было. Мы цалкам забяспечаны – рэспіратары, маскі, пальчаткі, камбінезоны, бахілы, ахоўныя экраны, акуляры. Такая ўвага да экіпіроўкі дазваляе спакойна працаваць», – дадала медык.

Закрануўшы тэму даплат для тых, хто працуе з каранавіруснай інфекцыяй, Вольга Сівапляс адзначыла, што ўсё, што абяцала дзяржава, яны атрымалі. «Прыемна, што пра нас клапоцяцца: пры такой рабоце рызыка для здароўя высокая. Але галоўная мэта ўрачоў не толькі нашай паліклінікі, але і ўсяго свету – перамагчы вірусную інфекцыю. І гэту працу мы будзем выконваць з поўнай аддачай», – падкрэсліла яна.

Галоўны ўрач паліклінікі Аляксандр Бабак расказаў, што ў іх строга выконваюцца супрацьэпідэмічныя меры. На ўваходзе ў паліклініку медыцынскі работнік вымярае тэмпературу бескантактавым прыборам кожнаму наведвальніку. У структурных падраздзяленнях арганізавана тэрмаметрыя супрацоўнікаў у пачатку і ў канцы працоўнага дня. Для пацыентаў з павышанай тэмпературай і прыкметамі рэспіраторных захворванняў выдзелена зона прыёму з асобным уваходам. Пры ўваходзе і на кожным паверсе ўстаноўлены дазатары з антысептыкам.

«Першапачаткова грамадзяне яшчэ грэбавалі сродкамі абароны, але цяпер сталі больш дысцыплінаванымі, многія пацыенты наведваюць урачоў-спецыялістаў у масках і пальчатках, – заўважыў Аляксандр Бабак. – У цэлым у нас за красавік-май зменшылася колькасць наведванняў, чэргаў няма нідзе. Больш стала пацыентаў, якіх наведваем дома. Для тых, у каго ёсць хранічныя захворванні, рэцэпты на лекі ўрачы выпісваюць на некалькі месяцаў наперад, і медработнікі дастаўляюць іх пацыентам на дом. Афармляюцца і электронныя рэцэпты».

На сённяшні дзень у Магілёўскай паліклініцы № 4 працуе 246 супрацоўнікаў, у тым ліку 76 урачоў. Тут пад наглядам знаходзіцца больш за 35 тыс.жыхароў горада.

БЕЛТА