Кропкі росту ёсць. Супрацоўніцтва Беларусі з Хабараўскім краем абмеркавалі ў Магілёве

У Магілёве прайшло сумеснае пасяджэнне рабочай групы па супрацоўніцтве Беларусі з Хабараўскім краем Расійскай Федэрацыі. Бакі абмеркавалі напрамкі і перспектывы ўзаемавыгаднага супрацоўніцтва.

Паводле слоў губернатара Хабараўскага края Дзмітрыя Дзямешіна, у гандлёва-эканамічным супрацоўніцтве дзвюх краін, а таксама Магілёўскай вобласці і расійскага рэгіёну ёсць яшчэ пункты росту. «Гэта магчымасць стварэння сервісных цэнтраў, пастаўкі канкрэтных відаў прадукцыі, у тым ліку аўтаматызаванай, - адзначыў ён. - Мы сшывалі гэтыя праблемы на месцы, менавіта для гэтага аб'язджалі прадпрыемствы, размаўлялі з менеджментам і разумелі, дзе мы патрэбны адзін аднаму. І, канешне, мы будзем гэта развіваць».

Сфера інтарэсаў Хабараўскага краю ў Магілёўскай вобласці - ліфты, аграпрамысловы комплекс, металаапрацоўка. «З магілёўскіх прадпрыемстваў пастаўляецца прадукцыя на хабараўскія заводы. Гэта мы таксама будзем развіваць, у тым ліку праз дзяржаўныя замовы, таму што прадукцыя падвойнага прызначэння можа выкарыстоўвацца ў розных відах прамысловых тэхналогій», - сказаў на заканчэнне ён.

Паводле слоў старшыні Магілёўскага аблвыканкама Анатоля Ісачанкі, адлегласць паміж Беларуссю і Хабараўскім краем 9 тыс. км цяпер не адлегласць, таму плённаму супрацоўніцтву быць. «Мы разгледзелі падчас працоўнай групы пытанні прамысловасці і аграпрамысловага комплексу, вялікую ўвагу надалі нашай моладзі, - адзначыў ён. - За апошнія сем гадоў тавараабарот паміж Хабараўскім краем і Беларуссю павялічыўся ў 1,7 раза. Гэта нядрэнныя лічбы, але, я думаю, не канчатковыя: з улікам выбудоўвання правільнай лагістыкі паказчыкі можна значна павялічыць. Самае галоўнае, каб была ўзаемная цікавасць і жаданне, каб было выгадна ўсім. І мы абавязкова гэта зробім, бо ў нас вельмі цесныя, сяброўскія адносіны».

За апошнія сем гадоў паміж Беларуссю і Хабараўскім краем экспарт павялічыўся ў 1,4 раза, імпарт - у 12,7 раза. Сальда знешняга гандлю на працягу сямі гадоў дадатнае і ў 2023 годзе склалася на ўзроўні $19,4 млн. У расійскі рэгіён пастаўляюць беларускую аўтамабільную і сельскагаспадарчую тэхніку, сыр і тварог, вырабы з пластмас, ліфты і многае іншае. У сваю чаргу найбольшая зацікаўленасць з боку Беларусі заключаецца ў набыцці рыбнай прадукцыі.

Сустрэча на магілёўскай зямлі павінна садзейнічаць сумеснаму пошуку рэзерваў для нарошчвання паміж рэгіёнамі тавараабароту па розных напрамках. Так, значныя магчымасці ёсць у пашырэнні ўзаемных паставак прадукцыі і пераходзе іх на сістэмную аснову. Асноўнымі напрамкамі тут павінны стаць пастаўкі грузавой, пасажырскай і сельскагаспадарчай тэхнікі, ліфтавага абсталявання, прадуктаў харчавання і іншых спажывецкіх тавараў у рамках прамых дагавораў.

Бакі ўпэўнены, што за эканомікай і гандлем нельга забывацца на сацыяльную сферу. Ёсць зацікаўленасць ва ўмацаванні культурных і турыстычных сувязей, правядзенні сумеснай работы ў сферы дзяржаўнай маладзёжнай палітыкі. Таму сустрэча ў Магілёве павінна стаць магутным імпульсам для далейшага плённага супрацоўніцтва і моцнага сяброўства паміж Беларуссю і Хабараўскім краем.

БЕЛТА