Леанід Мартынюк на прыёме грамадзян: работа па павышэнні якасці жыцця людзей павінна быць толькі сумеснай

Праца па павышэнні якасці жыцця людзей павінна быць толькі сумеснай, прычым яе эфектыўнасць залежыць як ад саміх грамадзян, так і ад прадстаўнікоў улады. Такой думкай з журналістамі падзяліўся памочнік Прэзідэнта - інспектар па Магілёўскай вобласці Леанід Мартынюк падчас прыёму грамадзян у Пашкоўскім сельсавеце.

Памочніку Прэзідэнта паступіла каля двух дзясяткаў пытанняў. У першую чаргу людзей хвалявалі рамонт дарог, добраўпарадкаванне тэрыторый, прадастаўленне зямельных участкаў, у тым ліку для выпасу жывёлы, выкупу арэнднага жылля ў прадпрыемства, устаноўкі дзіцячай пляцоўкі. Важна было абмеркаваць кожны прыватны выпадак, прапрацаваць дэталі і намеціць шляхі вырашэння. Для ўстаранення некаторых праблем патрабавалася дапамога з боку сельсавета, дэпутацкага корпуса, дзесьці ўсё залежала ад саміх людзей, якім не хапала толькі невялікай падтрымкі ў рэалізацыі іх ініцыятывы.

«Пытанні ЖКГ, добраўпарадкавання і рамонту дарог заўсёды стаялі ў прыярытэце, - адзначыў Леанід Мартынюк. - Наяўнасць такіх зваротаў на асабістых прыёмах характарызуе якасць работы дарожных службаў і ўсёй сістэмы жыллёва-камунальнай гаспадаркі, таму сітуацыя ў кожным раёне будзе адрознівацца і мець свае асаблівасці. Паўсядзённую працу гэтых службаў трэба не гэтулькі сістэматызаваць, колькі наладзіць узаемадзеянне паміж заяўнікам і выканаўцам. Менавіта тады можна казаць аб яе якасным выкананні. Нараканні паменшацца, але не знікнуць поўнасцю, бо людзі прывыклі жыць у камфортных умовах. У сваю чаргу задача ўлад усіх узроўняў, у тым ліку і сельскіх выканкамаў, забяспечыць насельніцтву дастойнае пражыванне. Для яе рэалізацыі трэба прыкласці максімум намаганняў».

Паводле слоў памочніка Прэзідэнта, у работу па забеспячэнні камфортнага жыцця насельніцтва павінны ўключацца і мясцовыя прадпрыемствы. Максімальна актыўным і ўцягнутым павінен быць удзел у гэтым пытанні таксама і сельскагаспадарчых прадпрыемстваў. «Мы ўсё жывем у соцыуме, таму няма розніцы, працуе чалавек на гэтым прадпрыемстве ці не, - падкрэсліў Леанід Мартынюк. - Увага да мясцовага жыхара з боку гаспадаркі павінна быць пільнай і важкай. Тым больш, калі гэта яго супрацоўнік, ад настрою якога залежыць стаўленне да ўсяго працоўнага працэсу. Калі вакол няма добраўпарадкавання, дарогі разбіты, адсутнічае асвятленне, пра якую працааддачу і рэзультатыўнасць тады можна гаварыць. Іншая справа, калі ўсё чыста і прыгожа».

Немалаважная і ініцыятыва людзей на месцах. Так, у невялікім населеным пункце шмат залежыць ад старасты вёскі. «Калі ад людзей зыходзіць хоць найменшая ініцыятыва, яе неабходна абавязкова падтрымліваць, бо часта для гэтага не заўсёды патрэбны фінансавыя ўліванні - важней арганізаваць гэту работу, - адзначыў Леанід Мартынюк. - Людзі самі гатовы нешта зрабіць, каб вакол стала лепш. Уявіце, калі дарослыя з дзецьмі разам пабудуюць гульнявую пляцоўку, то нават праз шмат гадоў хлопцы, якія падраслі, ніколі яе не зламаюць - як можна сапсаваць тое, што ты калісьці рабіў сваімі рукамі?».

«Менавіта таму работа па павышэнню якасці жыцця людзей павінна быць толькі сумеснай, прычым яе эфектыўнасць залежыць як ад саміх грамадзян, так і ад прадстаўнікоў улады - іх узаемадзеяння, узаемаразумення і самааддачы», - сказаў на заканчэнне памочнік Прэзідэнта.

БЕЛТА