Леанід Заяц: падтрымка жыхароў рэгіёна надае сіл для далейшай працы

Сёння ў Магілёве асабісты прыём грамадзян правёў старшыня аблвыканкама Леанід Заяц. Сярод тых, хто звярнуўся, была жыхарка Крычава, якая прыехала выказаць словы падзякі губернатару.

Жанчына расказала, што яе сям’я сутыкнулася з вялікай бядой –анкалагічнымі захворваннямі. Дзякуючы зладжанай працы ўсіх структур, асабістаму ўдзелу губернатара, яны не засталіся адзін на адзін са сваёй праблемай. «Я прыехала да Вас сёння, каб сказаць дзякуй ад сябе, мужа і маёй 90-гадовай маці. Я не пасаромеюся гучных слоў – вы выратавалі нам жыцці», – падкрэсліла заяўніца.

Яна інвалід III групы. З 2008 года знаходзіцца пад наглядам урача агульнай практыкі, неўролага, анколага і кардыёлага ў паліклініцы Крычаўскай ЦРБ, неаднаразова лячылася ва ўмовах стацыянара ў раённай бальніцы. Акрамя гэтага, жанчына атрымлівала кансультацыі і неабходную медыцынскую дапамогу ў Рэспубліканскім навукова-практычным цэнтры анкалогіі і медыцынскай радыялогіі М. М. Аляксандрава. У мінулым годзе ў яе мужа таксама выявілі анкалогію, ён атрымліваў неабходнае лячэнне ў РНПЦ, прайшоў некалькі курсаў хіміятэрапіі.

«Спачатку бяда прыйшла да мяне, потым да мужа, цяпер вось дачка мая ў Бараўляны едзе. Там чулыя, уважлівыя і прафесійныя ўрачы, якім мы таксама ўдзячныя за іх працу, – падкрэсліла пенсіянерка. – Дзякуючы Вашай увазе да праблем простых людзей, у нас ёсць сілы жыць далей і ўпэўненасць у заўтрашнім дні. Будзьце заўсёды здаровыя і хай толькі дабро прыходзіць у Ваш дом».

Леанід Заяц падкрэсліў, што за жыццё жанчыны і яе блізкіх у першую чаргу змагаліся ўрачы. «Гэта яны вам жыцці выратавалі, а даў яе Вам Гасподзь. І Вам яшчэ жыць і жыць на нашай зямлі. Ёсць у Вас яшчэ справы, якія трэба зрабіць. Жывіце і працуйце на карысць свайго краю, людзей побач, – адзначыў губернатар. – Дзякуй Вам за добрыя словы, яны надаюць сіл для далейшай працы».

БЕЛТА