Лесасекі Магілёўскай вобласці пасля непагадзі распрацоўваюць больш за 350 чалавек і каля 200 адзінак тэхнікі

Закасаўшы рукавы

Прэзідэнт паставіў дакладныя тэрміны па ўстараненні наступстваў урагану. У прыватнасці, спецыялісты лясной гаспадаркі да 1 лістапада павінны завяршыць суцэльныя санітарныя рубкі, а да канца года ўбраць адзінкавыя паваленыя дрэвы і захламленасць. На дзялянках Магілёўскай вобласці, адной з найбольш пацярпелых ад разгулу стыхіі, зараз працуюць больш за 350 чалавек, у тым ліку брыгады з Мінскай вобласці - на дапамогу прыйшлі Смалявіцкі, Чэрвеньскі і Бярэзінскі лясгасы. Задзейнічана каля 200 адзінак тэхнікі, у тым ліку 65 харвестараў. Больш за ўсё пацярпеў Быхаўскі лясгас: бураломы адбыліся там на плошчы звыш 5,1 тысячы гектараў.

У Чэрыкаўскім лясгасе стыхія пашкодзіла 137 гектараў лесу, з іх суцэльных высечак патрабуюць 87 гектараў. На распрацоўцы задзейнічана 30 чалавек, па два харвестэры і форвардэры. Паводле даных на 29 ліпеня, распрацавана 6,2 гектара плошчаў.

Вальшчык лесу Сяргей Сямёнаў разам з калегамі заняты на тэрыторыі ля трасы, якая вядзе на Магілёў:

- Асноўная ўвага цяпер дзялянкам у дарог. Ці мала, зноў шквальны вецер паднімецца, а тут ажыўлены рух. Трэба спрацаваць на апярэджанне, каб не дапусціць бяды.

І, вядома, найважнейшая задача, пастаўленая Прэзідэнтам, - выратаваць дзелавую і страявую драўніну. Сасна - на піламатэрыялы, бярозу - на фанеру, словам, каб усё, што магчыма, у справу пайшло. Тэрміны строгія, але нельга дапусціць, каб гэтая драўніна знікла. Няхай яна паслужыць людзям, а дзяржава заробіць дадатковую капейку ў бюджэт.

Вопыт у распрацоўцы ветравальна-бураломнай драўніны ў брыгады багаты — клімат мяняецца і надвор'е рэгулярна падкідвае сюрпрызы, гаворыць Сямёнаў:

- То ўраганны вецер, то снегу наваліць, то абледзянее ўсё. Таму для нас працаваць у выходныя ці ўначы - звыклая справа. Стаўлюся да гэтага спакойна: людзям трэба дапамагчы. Вось і на гэты раз ужо праз паўгадзіны пасля пачатку ўрагану паехалі дарогі «разразаць».

Працэс устаранення наступстваў стыхіі ў Магілёўскай вобласці ўключае і расчыстку грамадзянскіх могілак. На актуальнасці гэтых работ акцэнтаваў увагу Кіраўнік Адміністрацыі Прэзідэнта Дзмітрый Крутой ў час паездкі ў рэгіён па выніках селектарнай нарады ў кіраўніка дзяржавы. Усяго ў вобласці пацярпела ў той ці іншай ступені 197 месцаў пахавання. З іх 30 знаходзіцца ў Касцюковіцкім раёне. Па словах старшыні райвыканкама Вячаслава Максачова, наводзяць парадак на грамадзянскіх могілках замацаваныя арганізацыі, а дзе яны не спраўляюцца, падключаюцца лясгас, жылкамунгас, альпіністы:

- Што важна - не застаюцца ўбаку і мясцовыя жыхары. У цэлым аднаўленчыя працы пасля ўрагану ў нас выйшлі на фінішную прамую. Камунальнікі, дарожнікі і ратавальнікі прыбралі за некалькі гадзін каля 140 дрэў, што ўпалі на дарогі, - вялікіх затораў не было. У абясточаныя 57 населеных пунктаў святло падалі на працягу паўтара сутак пасля разгулу стыхіі. Аператыўна адрамантавалі тры пацярпелыя сельгасаб'екты. Перабоі з водазабеспячэннем былі кароткачасовымі, падвоз вады не запатрабаваўся. Ураган пашкодзіў каля 50 жылых дамоў. Тыя, што знаходзяцца на балансе сельгасарганізацый і Касцюковіцкага жылкамунгаса, адноўлены за тры дні. Што да прыватных дамоў, то страхавыя агенты разам з прадстаўнікамі сельвыканкамаў аператыўна выехалі на месцы, зрабілі заключэнні і ўжо правялі львіную долю выплат. Незастрахаваных дамоў некалькі, разбурэнні ў іх былі нязначныя. Мы дапамаглі з будматэрыяламі і з аднаўленчымі працамі. На шчасце, стыхія нас не моцна зачапіла, калі параўноўваць з іншымі раёнамі.

Усе службы спрацавалі добра, аператыўна прынялі неабходныя меры, таму ў райвыканкам не было ні зваротаў, ні скарг.

ПРАМАЯ МОВА

Старшыня Магілёўскага абласнога Савета дэпутатаў Аляксандр Гарошкін:

- З першых гадзін разгулу стыхіі ў працу па аказанні дапамогі пацярпеламу насельніцтву ўключыўся дэпутацкі корпус Магілёўскай вобласці ўсіх узроўняў. Дэпутаты сельскіх Саветаў правялі падваравы абход і дапамагалі камісіі ацэньваць урон, нанесены жылым дамам і гаспадарчым пабудовам. Быў аператыўна арганізаваны падвоз прадуктаў харчавання, вады і прадметаў першай неабходнасці. У далейшым забяспечана расчыстка вуліц гарадоў і вёсак. Цяпер арганізаваны работы, у тым ліку з асабістым удзелам дэпутатаў, па навядзенні парадку на тэрыторыях могілак і лясных угоддзяў. Прыкладзем усе намаганні, каб сумесна з выканаўчай уладай, работнікамі сістэмы ЖКГ, лясгасаў, энергетыкамі ўстараніць наступствы стыхіі ва ўстаноўленыя Прэзідэнтам краіны тэрміны.

СБ