Ліквідаваць наступствы ветравалаў Магілёўскай вобласці дапамогуць 80 лясгасаў з іншых раёнаў краіны

Распрацоўка ветравальна-бураломных лесасек знаходзіцца на кантролі кіраўніцтва галіны. На гэта звярнулі ўвагу ў ведамстве.

– Так, 20 мая ў міністэрстве адбылася аператыўная нарада па пытаннях ліквідацыі наступстваў непагадзі. Кіраўнікі ДВЛГА (дзяржаўных вытворчых лесагаспадарчых аб’яднанняў) і найбольш пацярпелых лясгасаў далажылі першаму намесніку міністра лясной гаспадаркі Аляксандру Драгуну і намесніку міністра Уладзіміру Крэчу аб сітуацыі з распрацоўкай пашкоджаных лесасек, – увяла ў курс справы прэс-сакратар Мінлясгаса Анастасія Мацкевіч.

Нагадаем, 12–13 мая па тэрыторыі краіны прайшлі моцныя вятры, якія паклалі нямала дрэў. І зноў самая пацярпелая вобласць – Магілёўская.

Па словах галоўнага ляснічага Магілёўскага ДВЛГА Алега Селіха, за апошнія два дні ў выніку даабследаванняў толькі па суцэльных санітарных высечках аб’ёмы выраслі на 400 гектараў і склалі ўжо 3,4 тысячы гектараў. Пры гэтым, паводле прагнозаў спецыяліста, канчатковая лічба сфарміруецца на адзнацы 4 тысячы гектараў.

Перад галіной у гэтай сувязі цяпер шэраг аператыўных задач. Сярод іх – як мага хутчэй правесці адводы лесасек. Для гэтага ў найбольш пацярпелыя лясгасы выехалі спецыялісты РУП «Белдзяржлес». Іх дапамогі ў правядзенні адводаў чакаюць у Клімавіцкім, Горацкім, Быхаўскім і шэрагу іншых лясгасаў. Дарэчы, менавіта РУП «Белдзяржлес» даручана ўзяць на сябе каардынацыю гэтых работ у вобласці.

Таксама да панядзелка лясгасы павінны сфарміраваць пералік ветравальна-бураломных участкаў, якія патрабуюць правядзення суцэльных санітарных высечак, і выставіць іх на таргі. Пачынаючы з 24 мая, таргі драўнінай на корані будуць праводзіцца штодня. Зроблена гэта для прываблівання да распрацоўкі індывідуальных прадпрымальнікаў.

У панядзелак уся лесанарыхтоўчая тэхніка ўжо павінна працаваць у пацярпелых лясгасах. Сёння на Магілёўшчыну з іншых рэгіёнаў краіны прыбыло 82 харвестэры, якія прыступілі да распрацоўкі пашкоджаных насаджэнняў. Намеснік міністра Крэч адзначыў, што гэтага недастаткова. Запраўка і рамонт тэхнікі будуць ажыццяўляцца з выездам на месца і ў самыя кароткія тэрміны. Маршруты руху аўтазапраўшчыкаў, чакаецца, будуць узгоднены ўжо сёння. Што тычыцца рамонту, то сэрвісныя цэнтры «Амкадор» і «МАЗ» размешчаны ў Магілёве, іх спецыялісты гатовы ў самыя кароткія тэрміны выехаць на месца.

Характэрна, што на дапамогу Магілёўскай вобласці прыйдуць 80 лясгасаў з іншых рэгіёнаў краіны. Кожны з іх распрацуе мінімум па 30 гектараў пашкоджаных насаджэнняў. Адзначым, што гэта лічба раней была меншай, але сёння была павялічана з улікам вынікаў даабследавання ляснога фонду. У гэтай сувязі асаблівую ўвагу нададуць ахове працы і выкананню супрацькаранавірусных мерапрыемстваў. Пры гэтым у Мінлясгасе падкрэсліваюць, што работнікі, якія ўдзельнічаюць у распрацоўцы бураломаў, павінны працаваць у годных умовах. Гэта задача намеснікаў кіраўнікоў арганізацый па ідэалагічнай працы.

– Арганізацыя размяшчэння, харчавання работнікаў, маральна-псіхалагічны клімат – гэта задачы ідэолагаў, якія павінны быць правай рукой і ўвесь час знаходзіцца ў лесе, – акрэсліў задачу першы намеснік міністра Аляксандр Драгун.

Акрамя гэтага, перад галіной стаіць яшчэ адна задача – з улікам вялікіх пашкоджаных плошчаў падрыхтаваць лесасекі так, каб у наступным можна было ажыццяўляць механізаваны догляд маладых культур. Плюс цяпер трэба забяспечыць захаванасць ссечанай драўніны, папярэдзіць спробы крадзяжу. Для гэтага будуць выкарыстоўваць фотапасткі, якія ўсталююць у месцах складзіравання. Акрамя гэтага, створаны мабільныя групы, задача якіх – праверка лесавозаў.

На асаблівым кантролі – пажарная бяспека ў лясах. Найбольш пацярпелыя раёны ініцыіруюць перад райвыканкамамі ўвядзенне абмежаванняў на наведванне лясоў: як-ніяк, гуляць каля пашкоджаных дрэў небяспечна. Бліжэй сцягнуць і тэхніку для тушэння пажараў.

СБ