Магіляўчане, якія перахварэлі на каранавірус, сталі донарамі плазмы

Першыя донары з Магілёва здалі плазму з антыцеламі да COVID-19. Гэтую частку крыві цяпер пераліваюць пацыентам, якія праходзяць лячэнне, і вельмі спадзяюцца, што яна дапаможа паскорыць працэс выздараўлення.

Валянціна Лысава–першая жыхарка рэгіёна, якая стала донарам імуннай плазмы. Пасля каранавіруснай інфекцыі ў яе крыві ўтварыліся імунаглабуліны супраць віруса SARS-CoV-2, які і з’яўляецца ўзбуджальнікам COVID-19. З іх дапамогай імунная сістэма магіляўчанкі змагалася з вірусам. На медыцынскай мове такая плазма называецца реканвалесцэнтнай.

Спісы тых, хто перахварэў на каранавірус і чый факт выздараўлення клінічна пацверджаны, установы аховы здароўя накіроўваюць на станцыю пералівання крыві. Нямала і тых, хто сам жадае дапамагчы. Цяпер плазма такіх донараў літаральна на вагу золата. Бо з імунаглабулінамі-G яна забяспечыць пасіўны імунітэт пацыенту, які толькі праходзіць лячэнне.

Абмінуць паўгадавы каранцін атрымалася з дапамогай спецыяльнага апарата для патагенрэдукцыі кампанентаў крыві: плазмы і трамбацытаў. Тут яго выкарыстоўваюць не першы год – для атрымання чыстых кампанентаў крыві для тых, каму тэрмінова неабходна пераліванне – нованароджаным, парадзіхам, анкахворым.

Уся працэдура ачышчэння займае 40–50 хвілін. Кожная данацыя (гэта 600 мл) будзе падзелена на 3 роўныя порцыі. Гэтага хопіць на 3 пераліванні хворым пацыентам. Самая рэдкая і самая ўніверсальная плазма анты-COVID -19–IV групы крыві–можа быць пералітая любому.

Патрэба ў крыві і плазме не паменшылася. Штодня на станцыі каля 50 донараў крыві і столькі ж донараў плазмы і трамбацытаў. Бо сапраўдная мэта донарства–выратаванне чалавечага жыцця. А значыць, імкненне дапамагаць па клічы сэрца мацнейшаеза любую хваробу.

ТРК «Магілёў»