Магілёўская абласная федэрацыя барацьбы правяла справаздачную канферэнцыю

У Магілёве прайшла справаздачная канферэнцыя абласной федэрацыі барацьбы, якая аб’ядноўвае тры яе віды: барацьбу вольную мужчынскую, жаночую і грэка-рымскую. У працы канферэнцыі прынялі ўдзел профільныя трэнеры-выкладчыкі, спецыялісты, спартсмены, дырэктары дзіцяча-юнацкіх спартыўных школ. Падчас канферэнцыі былі падведзены вынікі аб праведзенай працы за справаздачны перыяд, пазначаны планы на будучыню.

Старшыня федэрацыі, намеснік старшыні Магаблвыканкама Валерый Малашка адзначыў эфектыўную і дзейсную працу федэрацыі, маючы на ўвазе як рашэнне бягучых пытанняў па развіцці і ўдасканаленні барацьбы як віду спорту, умацаванні матэрыяльна-тэхнічнай базы, прывабліванні ў спорт моладзі, так і поспехі на ўзроўні спорту найвышэйшых дасягненняў – алімпійскія медалі ў Токіа прадстаўніц Магілёўшчыны Ірыны Курачкінай і Ванэсы Каладзінскай. Аднак супакойвацца не варта: наперадзе Алімпіяда-2024 у Парыжы, і нашы атлеты там таксама павінны праявіць сябе годна, а для гэтага трэба шмат і адказна рыхтавацца. І рабіць гэта трэба ўжо сёння, падкрэсліў Валерый Малашка.

Аб бягучых справах і надзённых праблемах выказаліся старэйшыя трэнеры вобласці – па барацьбе вольнай (юнакі) Віктар Цітоў і жаночай Сяргей Мялькоў. Іх заўвагі і прапановы ўзятыя кіраўніцтвам федэрацыі «на аловак» для аналізу і далейшага рашэння.

У ходзе канферэнцыі былі абмеркаваны кадравыя і арганізацыйныя пытанні. Адзначана, што трэнерскі корпус папаўняецца маладымі, неабыякавымі спецыялістамі, а гэта дазваляе глядзець у будучыню з аптымізмам.

Вынікам канферэнцыі стала прыемная цырымонія ўзнагароджання граматамі і дыпломамі спартсменаў і трэнераў-выкладчыкаў, якія дабіліся высокіх паказчыкаў у сваёй дзейнасці. Сярод іх Сяргей Мялькоў, Віктар Мураўскі, Сяргей Лукомскі, Людміла Батрачэнка. Асаблівых апладысментаў атрымала узыходзячая зорка барцоўскай школы Магілёўшчыны, навучэнка МДУАР Алеся Гетманава, якая стала чэмпіёнкай свету сярод юніёраў на ЧС-2021, які праходзіў ва Уфе.

mogilevnews.by