Магілёўская гімназія-каледж мастацтваў падпісала дагавор аб супрацоўніцтве з музычнай школай Літвы

Магілёўская дзяржаўная гімназія-каледж мастацтваў падпісала дагавор аб творчым супрацоўніцтве з Каўнаскай музычнай школай № 1 (Літва). Дзеянне дакумента разлічана на пяць гадоў, паведаміла намеснік дырэктара гімназіі-каледжа мастацтваў па выхаваўчай рабоце Наталля Курыла.

«Разумеючы, што школы будучага – гэта не спаборніцтва, а супрацоўніцтва, гімназія-каледж мастацтваў даўно сябруе з музычнымі навучальнымі ўстановамі Расіі, Літвы, Латвіі і Польшчы, якія маюць багатую гісторыю, свае асаблівасці, «каштоўнасці», – адзначыла субяседніца. – Мы атрымліваем новыя веды і дзелімся вопытам у галіне інструментальнага выканальніцтва, шмат чаму вучымся адзін у аднаго. Часта бываючы ў сяброў у розных краінах, збіраем скарбы сусветнага мастацтва, выхоўваем у навучэнцаў павагу да розных культурных традыцый, талерантнасць. Спадзяёмся, што з кожным годам міжнароднае творчае супрацоўніцтва гімназіі-каледжа з музычнымі навучальнымі ўстановамі будзе пашырацца, а педагогаў і навучэнцаў чакаюць новыя цікавыя падзеі. І аснова гэтага – мастацтва, якое збліжае і аб’ядноўвае людзей усёй планеты».

Падпісанне дагавора адбылося падчас візіту Магілёўскай дэлегацыі на чале з дырэктарам гімназіі-каледжа Аляксандрам Курсаковым у літоўскі Каўнас. Праграма наведвання была насычанай. Сярод мерапрыемстваў – удзел у міжнародным конкурсе выканаўцаў класічнай музыкі «Kaunas Sonorum», майстар-класы членаў журы, творчыя сустрэчы.

Дарэчы, V Міжнародны конкурс выканаўцаў класічнай музыкі «Kaunas Sonorum» сабраў больш за 500 юных музыкантаў з 19 краін свету і шматлікіх каўнаскіх меламанаў. Арганізатарам спаборніцтва, якое праходзіць адзін раз на два гады, з’яўляецца Каўнаская гарадская дума, партнёрамі – Каўнаская дзяржаўная філармонія і кансерваторыя; апекуном – мэр горада Вісвалдас Маціёшайціс.

Конкурс праводзіўся ў некалькіх намінацыях. У катэгорыі «Народныя інструменты» ў розных узроставых катэгорыях удзельнічала 90 юных талентаў з розных краін. Нягледзячы на тое, што канкурэнцыя была высокая, магілёўскія дзяўчынкі і хлапчукі выступілі годна: навучэнка 8 класа Лізавета Туз (выкладчык Алена Дарашэнка) удастоена дыплома лаўрэата за 2 месца і ўзнагароджана памятным медалём; навучэнец 7 класа Мацвей Круцікаў (выкладчык Вера Грашчанка) – звання дыпламанта конкурсу. Навучэнцы Ларыса Філіпчанка, Антон Конанаў і Паліна Сініца атрымалі дыпломы ўдзельнікаў.