Магілёўскі абласны тэатр лялек удастоены дыплома лаўрэата ў намінацыі «Лепшы спектакль» на фестывалі ў Санкт-Пецярбургу

Магілёўскі абласны тэатр лялек удастоены дыплома лаўрэата ў намінацыі «Лепшы спектакль» на XVII Міжнародным фестывалі-біенале лялечных і сінтэтычных тэатраў «КУКАRТ» (Санкт-Пецярбург). Пра гэта расказалі ва ўстанове культуры.

Як распавялі суразмоўцы, пастаноўка «Дзівосныя авантуры паноў Кубліцкага ды Заблоцкага» рэжысёра Ігара Казакова была цёпла прынята фестывальнай публікай і атрымала шмат станоўчых водгукаў.

У час правядзення фестывалю было падпісана пагадненне аб культурным супрацоўніцтве паміж Магілёўскім абласным тэатрам лялек і Санкт-Пецярбургскім дзяржаўным тэатрам марыянетак ім. Я. С. Дэмені.

«КУКАRТ» - самы буйны форум лялечнікаў, які не мае аналагаў на расійскай тэатральнай і арт-сцэне. Сёлета фестываль працягнуў знаёміць гледачоў з найноўшымі тэндэнцыямі сучаснага мастацтва лялечных і сінтэтычных тэатраў ва ўсёй яго жанравай разнастайнасці: ад марыянетак да тэатра ценяў і аўдыёвізуальных перформансаў. У асноўнай праграме былі паказаны лепшыя пастаноўкі расійскіх і замежных тэатраў лялек, у спецыяльнай праграме «Пятрушкі на Неўскім» прынялі ўдзел «вандроўныя лялечнікі», эксперыментальныя і сінтэтычныя праекты творчых груп сучасных мастацкіх, арт, відэа і музычных напрамкаў.

Дарэчы, Магілёўскі абласны тэатр лялек атрымаў запрашэнне ўзяць удзел у наступным фестывалі «КУКАRТ», які пройдзе ў 2027 годзе.

Рэд.