Магілёўскую вобласць на УНС прадставіць 41 дэлегат ад мясцовых Саветаў дэпутатаў

Пазачарговую другую сесію Магілёўскага абласнога Савета дэпутатаў правёў сёння старшыня аблсавета Аляксандр Гарошкін. Удзел у ёй узялі намеснік старшыні аблвыканкама Валерый Малашка, кіраўнік спраў аблвыканкама Мікалай Дзядкоў. А таксама дэпутаты абласнога Савета, члены аблвыканкама, кіраўнікі структурных падраздзяленняў аблвыканкама, старшыні гарадскіх і раённых Саветаў дэпутатаў, прадстаўнікі сродкаў масавай інфармацыі.

Асноўнымі на парадку дня сталі пытанні аб колькасці дэлегатаў Усебеларускага народнага сходу, якія падлягаюць абранню ад мясцовых Саветаў дэпутатаў Магілёўшчыны, а таксама аб утварэнні прэзідыума абласнога Савета дэпутатаў дваццаць дзевятага склікання.

«Стварэнне вертыкалі заканадаўчай улады ў рэгіёне цалкам завяршылася - сёння абраныя старшыні сельскіх Саветаў дэпутатаў. Тым самым мы падвялі рысу выбарчай кампаніі, і я віншую ўсіх дэпутатаў з абраннем на гэтыя пасады і жадаю плённай працы на карысць нашага Прыдняпроўскага краю і яго жыхароў, у цэлым - нашай дзяржавы. Шмат працы наперадзе, на сёння нашы задачы ўжо вызначаны і вядомы. А тыя, што будуць з'яўляцца ў працэсе нашай дзейнасці, мы будзем аператыўна разглядаць і вырашаць», - адзначыў у сваім уступным слове Аляксандр Гарошкін.

Далей з дакладам выступіў начальнік галоўнага ўпраўлення арганізацыйна-кадравай работы аблвыканкама Сяргей Іваноў. Ён расказаў, што Магілёўскую вобласць на Усебеларускім народным сходзе ад мясцовых Саветаў дэпутатаў прадставіць 41 дэлегат. Норма ўстаноўлена згодна з дзейным заканадаўствам, зыходзячы з устаноўленай гранічнай колькасці дэлегатаў ВНС ад мясцовых Саветаў дэпутатаў у колькасці 350 чалавек.

«Улічваючы, што ў адзіны дзень галасавання, 25 лютага, на тэрыторыі вобласці было абрана 52 дэпутаты абласнога Савета дэпутатаў, 688 - гарадскіх і раённых, 1064 - сельскіх, вызначаны наступны склад: ад абласнога Савета дэпутатаў - 8 дэлегатаў (19,5% ад агульнага колькасці), ад раённых і гарадскіх - 17 дэлегатаў (41,5%), ад сельскіх - 16 дэлегатаў (39%), - растлумачыў ён. - Згодна з Выбарчым кодэксам, вылучэнне кандыдатаў у дэлегаты ВНС ад мясцовых Саветаў дэпутатаў пачынаецца не раней, чым праз 15 дзён і заканчваецца не пазней чым праз 35 дзён пасля адзінага дня галасавання. Адпаведна пройдзе яно ў перыяд з 12 па 31 сакавіка. Права вылучэння кандыдатаў у дэлегаты ВНС ад мясцовых Саветаў дэпутатаў належыць прэзідыумам абласных, раённых, гарадскіх (у гарадах абласнога падпарадкавання), гарадскім (у гарадах раённага падпарадкавання), пасялковым і сельскім Саветам дэпутатаў. Рашэнні аб вылучэнні асоб кандыдатамі ў дэлегаты ВНС ад мясцовых Саветаў дэпутатаў базавага, першаснага ўзроўняў накіроўваюцца ў аблсавет у трохдзённы тэрмін з дня іх прыняцця».

Таксама ў час работы сесіі быў вызначаны склад пастаянных камісій і разгледжаны пытанні, якія патрабавалі ўдакладненняў і змяненняў некаторых рашэнняў абласнога Савета дэпутатаў.

Юлія Таранава, фота Галіны Гаўрыловіч