Медыцынскія ўстановы Кругляншчыны з году ў год папаўняюцца маладымі спецыялістамі. Кожны, хто прыехаў у раён на першае месца працы, не застаецца па-за ўвагай з боку раённай улады, у сваіх працоўных калектывах і ў мясцовай прэсе. Не першы год працуюць ва УАЗ «Круглянская ЦРБ» і, можна сказаць, цалкам «прыжыліся» і асвоіліся на сваіх працоўных месцах, у працоўных калектывах маладыя лекары Ангеліна Падзіракіна, Наталля Фёдаравіч, Марыя Букрэева.
Ангеліна Падзіракіна, урач-тэрапеўт тэрапеўтычнага аддзялення раённай бальніцы:
- Працую ў першым і другім тэрапеўтычных аддзяленнях, а таксама ў прыёмным аддзяленні райбальніцы. Працу сваю кахаю таму, што бачу яе пэўны вынік. Калі вядзеш хворага і штодня аналізуеш працэс лячэння, разумееш, як важна пацыенту твая медычная ўвага і разуменне яго стану здароўя. Назіраючы, што курс лячэння абраны правільна і індывідуальны падыход да хворага знойдзены, чалавек ідзе на папраўку, адчуваю сапраўднае задавальненне ад праведзенай працы. Значыць, прафесію выбрала правільна. Калектывы аддзяленняў вельмі згуртаваныя, працавітыя, у іх працуюць лагодныя і спагадныя людзі, сярод якіх камфортна і мне. Побач з тымі, хто адданы сваёй прафесіі, заўсёды лёгка, бо ў іх ёсць чаму павучыцца, да іх заўсёды можна звярнуцца па дапамогу і быць упэўненым у тым, што ты сярод аднадумцаў.
Наталля Федаровіч, урач лабараторнай дыягностыкі раённай паліклінікі, цвёрда пераканана ў тым, што без лабараторных даследаванняў немагчыма правільна паставіць дыягназ і прызначыць пацыенту лячэнне. Таму і працу сваю лічыць запатрабаванай і вельмі важнай. Тым больш, што за чатыры гады ў калектыве раённай паліклінікі стала сваёй, роднай. Зарэкамендавала сябе са станоўчага боку, сярод калег і адміністрацыі бальніцы карыстаецца аўтарытэтам і лічыцца вельмі адказным і квалифіцыраваным спецыялістам. Актыўная ўдзельніца ўсіх мерапрыемстваў, якія праводзяцца ва ўстанове аховы здароўя і ў раёне, энергічная, вясёлая і прыязная - так пра яе адклікаюцца калегі.
Марыя Букрэева, урач-аталарынголаг раённай паліклінікі:
- Працай сваёй даражу, мне яна падабаецца, аб абранай прафесіі не шкадую. У калектыве, на мой погляд, знайшла разуменне і падтрымку ў калег і адміністрацыі. За паўтара года здабыла шмат аднадумцаў, сяброў і вельмі рада, што ўсё ў маім жыцці і на працы атрымліваецца.
У сваім першым інтэрв'ю ў раённай газеце Марыя расказвала пра сябе і свае захапленні. Дык вось праз час можна сказаць, што малады лекар усебакова адкрылася і паказала сябе не толькі як добры доктар, але і чалавек з актыўнай жыццёвай пазіцыяй.
Сёння яна з'яўляецца актывісткай БРСМ і валанцёрам Чырвонага Крыжа, узначальвае валанцёрскую групу райбальніцы «Рады дапамагчы». Марыя ўвесь час прымае ўдзел у розных конкурсах і мерапрыемствах. Напрыклад, на нядаўнім раённым фестывалі народнай творчасці «Мая Кругляншчына», абараняючы гонар калектыву, Марыя чытала вершы, таксама ў снежні ўдзельнічала ў маладзёжнай спартландыі. І гэта толькі невялікая частка яе талентаў і здольнасцей.
krugloe.by
