Малыя фермы на Магілёўшчыне пры пераходзе на пашавае ўтрыманне даюць істотную прыбаўку малака

Па двух гуртах у 350 галоў, якія знаходзяцца на кругласутачнай пашы, у ААТ «Фірма “Кадзіна”» Магілёўскага раёна сутачныя надоі плюсуюць па 1,7 кілаграма малака ад каровы. А да 1 чэрвеня, паводле слоў намесніка дырэктара Генадзя Разганава, чакаюць прыбаўку да 3 кілаграмаў. Вядома, расце прадукцыйнасць і на малочна-таварным комплексе «Кадзіна», дзе таксама ўключаны зялёны канвеер.

– У цэлым па гаспадарцы ў параўнанні з аналагічным перыядам мінулага года мы дадалі 1700 кілаграмаў малака. Акрамя гэтага, пры пашавым утрыманні істотна эканомім на выкарыстанні канцэнтраваных кармоў, зніжаючы сабекошт вытворчасці малака. Дарэчы, у мінулым годзе яго рэнтабельнасць склала 33 працэнты. Інакш кажучы, рэалізаваўшы малака на 3,3 мільёна рублёў, мы атрымалі 1,1 мільёна чыстага прыбытку.

Паўсюдна ўжываецца метад франтальнай пашы, дзякуючы чаму паша выкарыстоўваецца больш эфектыўна і эканамічна. У Магілёўскім раёне ўгоддзі для выпасу жывёлы цалкам адпавядаюць нарматыву: на галаву буйной рагатай жывёлы па 50 паўнавартасных сотак. Перад пачаткам сезона жывёлы прайшлі неабходныя супрацьпаразітарныя апрацоўкі. Паўсюдна арганізаваны падвоз вады, солі, патакі. У раёне выпасаецца больш за 30 гуртоў, у якіх на «вольныя хлябы» адправілася 5000 кароў і 1600 цёлак.

Паступова пераходзячы на травяны манакорм, дойны статак з малых ферм магілёўскіх гаспадарак за тыдзень дадаў амаль 5000 кілаграмаў малака. Растуць надоі і ў гаспадарках, дзе дастатковыя запасы кармоў, і там, дзе на зімова-стойлавы перыяд іх аказалася ўпрытык, асабліва гэта тычыцца канцэнтратаў.

– Натуральную збалансаванасць пажыўных рэчываў маладой травы наўрад ці можна параўнаць з любым штучным відам корму, – упэўнены начальнік вытворчага аддзела райсельгасхарча Магілёўскага райвыканкама Уладзімір Цюльмянкоў. – На фермах адразу сталі прыбываць надоі. На МТФ «Салтанаўка» у ААТ «Эксперыментальная база “Дашкаўка”», выйшаўшы на азімае жыта, статак у 120 кароў даў прыбаўку больш за 500 кілаграмаў малака. І гэта толькі адзін прыклад. Многія статкі выйшлі на азімую свірэпіцу і шматкампанентныя пашы, што таксама значна павышае іх патэнцыял.

Праз два тыдні пасля выхаду жывёл у поле летнія надоі павінны стабілізавацца ў дынаміцы росту. Па вобласці ўжо дадалося больш за 90 тон малака за суткі. На сёння выпасаецца амаль 100 тысяч галоў. З іх большая частка – у кругласутачным рэжыме.

СБ