Медалёў і ганаровага звання ўдастоены трое прадстаўнікоў Магілёўскай вобласці

Ордэнамі, медалямі і ганаровымі званнямі адзначаны 33 прадстаўнікі розных сфер дзейнасці за шматгадовую плённую працу, прафесіяналізм, мужнасць і адвагу, праяўленыя пры ратаванні людзей на вадзе, вялікі асабісты ўклад у развіццё кардыялагічнай і эндакрыналагічнай службы, падрыхтоўку высокакваліфікаваных спецыялістаў, рэалізацыю дзяржаўнай палітыкі ў галіне статыстыкі, значныя дасягненні ў навукова-даследчай працы, прамысловасці, дрэваапрацоўцы, сельскай і дарожнай гаспадарках, сферах аховы здароўя, культуры і мастацтва. Адпаведны ўказ падпісаў Прэзідэнт Беларусі Аляксандр Лукашэнка.

У прыватнасці, вялікая група работнікаў розных галін удастоена медаля «За працоўныя заслугі». У іх ліку – начальнік аддзела арганізацыйна-кадравай і прававой работы галоўнага статыстычнага ўпраўлення Магілёўскай вобласці Галіна Барэцкая і намеснік начальніка цэнтра навукова-тэхнічных распрацовак ААТ «Кіруючая кампанія холдынгу “Бабруйскаграмаш”» Дзяніс Жвырблеўскі.

На падставе ўказа таксама прысвоены ганаровыя званні Рэспублікі Беларусь. Так, прафесар кафедры «Транспартныя і тэхналагічныя машыны» Беларуска-Расійскага ўніверсітэта Уладзімір Тарасік удастоены звання «Заслужаны дзеяч навукі Рэспублікі Беларусь».