Міністэрства аховы здароўя апублікавала абноўлены пералік стацыянарных устаноў для лячэння пацыентаў з каранавірусам у Магілёўскай вобласці

Некаторыя бальніцы у Беларусі перапрафіляваны, каб забяспечыць медыцынскай дапамогай пацыентаў з выяўленай каранавіруснай інфекцыяй. Абноўлены пералік такіх стацыянараў апублікаваны на сайце Міністэрства аховы здароўя.

У прыватнасці, паведамляецца, што ў Магілёўскай вобласці працуюць 62 бальнічныя арганізацыі. Агульная колькасць ложкаў у стацыянарах складае 10 661. Перапрафілявана для аказання медыцынскай дапамогі пацыентам з COVID-19 і пнеўманіяй – 3266.

У рэгіёне пацыентаў з COVID-19 шпіталізуюць у Магілёўскі абласны супрацьтуберкулёзны дыспансер, інфекцыйную бальніцу, гарадскую бальніцу хуткай медыцынскай дапамогі, Магілёўскую бальніцу № 1, Бабруйскую цэнтральную бальніцу, Магілёўскую абласную бальніцу медыцынскай рэабілітацыі (далечванне), часткова выкарыстоўваецца ложкавы фонд Бабруйскага міжраённага анкалагічнага дыспансера, Магілёўскай абласной клінічнай бальніцы, Магілёўскай абласной дзіцячай бальніцы, Магілёўскага абласнога анкалагічнага дыспансера.

Перапрафіляваны аддзяленні пад лячэнне пацыентаў з COVID-19 ва ўсіх цэнтральных раённых бальніцах.

З 15 кастрычніка дадаткова перапрафілявана для аказання дапамогі пацыентам з каранавіруснай інфекцыяй аддзяленне ў Магілёўскім абласным шпіталі інвалідаў Айчыннай вайны. Акрамя таго, Глушанская ўчастковая бальніца перапрафілявана для далечвання пацыентаў з каранавіруснай інфекцыяй.